مکیش امبانی کے گھر کے قریب جلیٹن اسٹک سے بھری کار ملنے کے معاملے میں ممبئی کے پولیس کمشنر کے عہدے سے ہٹائے گئے پرمبیر سنگھ نے اپنے تبادلے کو بھی عدالت عُظمیٰ میں چیلنج کیا ہے۔
پرمبیر سنگھ پہنچے سپریم کورٹ، تبادلے کو کیا چیلنج
مہاراشٹر میں جاری سیاسی گھمسان کے درمیان ممبئی کے سابق پولیس کمشنر پرمبیرسنگھ نے ریاست کے وزیر داخلہ انل دیشمکھ کے خلاف بدعنوانی کے الزامات کی تحقیقات سی بی آئی سے کرانے اور اپنے تبادلے پر روک لگانے کے مطالبے کے سلسلے میں سپریم کورٹ کا دروازہ کھٹکھٹایا ہے۔
parambir singh
درخواست گزار پرمبیر سنگھ نے الزام عائد کیا ہے کہ وزیر داخلہ انل دیشمکھ اپنی رہائش گاہ پر فروری 2021 میں ممبئی کرائم کی خفیہ یونٹ کے سچن وازے اور ممبئی کے سوشل سروس برانچ کے اے سی پی سنجے پاٹل سمیت مختلف پولیس افسران سے ملاقات کی تھی اور انہیں ہر ماہ 100 کروڑ روپے جمع کرانے کی ہدایت دی تھی۔ ان افسران کو مختلف اداروں اور دیگر ذرائع سے وصولی کرنے کے لیے کہا گیا تھا۔
انہوں نے اپنی درخواست میں کہا ہے کہ انل دیشمکھ کے گھر میں لگے سی سی ٹی وی کیمروں کو قبضے میں لے کر اس کی چھان بین کی جانی چاہیے تاکہ ان کے یہاں آنے جانے والے افسران کی فہرست تیار کی جاسکے۔ اور اس پورے معاملے کی جانچ سی بی آئی سے کرائی جائے۔