ممبئی: مہاراشٹر کے دار الحکومت ممبئی میں اپوزیشن کے اتحاد ’انڈیا‘ کا اجلاس آج سے شروع ہونے جا رہا ہے۔ انڈیا کا دو روزہ اجلاس 31 اگست اور یکم ستمبر کو منعقد ہوگا اور اس اجلاس میں شرکت کرنے والوں کے لئے ممبئی کے ہوٹل گرینڈ حیات میں 150 کمرے بک کئے گئے ہیں۔ اپوزیشن پارٹیوں کے اتحاد ’انڈیا‘ کے اجلاس کے ایجنڈے میں اتحاد کے ’لوگو ‘کی نقاب کشائی، رابطہ کمیٹی کی تشکیل، کنوینرز کی تقرری، عام انتخابات کے لیے ممکنہ سیٹ شیئرنگ فارمولے یعنی نشستوں کی تقسیم کے فارمولے پر بحث، عام انتخابات کے لیے حکمت عملی اور کئی دیگر اہم امور پر تبادلہ خیال شامل ہیں۔
شیو سینا ( ادھو ٹھاکرے گروپ) نے پیر کے روز اپوزیشن اتحاد انڈیا کے ممبئی اجلاس کے حوالہ سے پہلا ویڈیو ٹیزر جاری کیا تھا۔ رپورٹ کے مطابق ہوٹل میں کمروں کی بکنگ اور 31 اگست کو عشائیہ کا انتظام شیو سینا ( ادھو ٹھاکرے گروپ) کی جانب سے کیا جا رہا ہے، اس دن اتحاد کے قائدین غیر رسمی ملاقات کریں گے۔ جبکہ اگلے دن یعنی یکم ستمبر کو کانگریس پارٹی کی جانب سے ظہرانہ کا اہتمام کیا جائے گا اور اس دن اپوزیشن اتحاد کے تمام رہنما رسمی ملاقات کریں گے۔
اپوزیشن کے اتحاد کے اجلاس کے ضمن میں تمام اخباروں اور دیگر مقامات پر اشتہارات کی ذمہ داری بھی کانگریس پارٹی کو دی گئی ہے۔ نیشنلسٹ کانگریس پارٹی کی جانب سے تمام مہمانوں کے لئے آمد ورفت کے لئے گاڑیوں کا انتظام کیا جا رہا ہے۔ سنجے نروپم ایئرپورٹ پر اجلاس میں شرکت کے لئے آنے والے تمام مہمانوں کا استقبال کریں گے جبکہ ملند دیوڑا مہمانوں کا ہوٹل میں خیر مقدم کریں گے۔