پیاز بیس ہزار روپے فی کوئنٹل!

ملک کی تاریخ میں ایسا پہلی بار ہوا ہے کہ ریاست مہاراشٹر کے تعلقہ اکل کوٹ میں کسان کو فی کوئنٹل پیاز کا دام بیس ہزار روپے ملا ہے۔

مہاراشٹر کے ضلع سولا پور کے تعلقہ اکل کوٹ میں واقع گوڈ گاؤں کے ایک نوجوان کسان شیوانند پھلاری کی تین کوئنٹل پیاز اتپن بازار سمیتی میں فروخت کرنے کے لیے لائی گئی۔

پھلاری کو فی کوئنٹل پیاز کے لیے سب سے زیادہ دام یعنی بیس ہزار روپے ملے۔

یہ دام انہیں پیاز کی نیلامی کے دوران ملے ہیں اور ملک کی تاریخ میں بیس ہزار روپے فی کوئنٹل پیاز فروخت ہونے کا یہ پہلا واقعہ ہے۔

واضح رہے کہ گزشتہ کئی روز سے سولاپور کرشی اتپن بازار سمیتی میں پیاز کے دام میں مسلسل اضافہ ہو رہا ہے۔

بازار میں تین کوئنٹل پیاز بیس بیس ہزار روپے کے دام پر فروخت ہوئی ہے جبکہ بازار میں فی کوئنٹل پیاز کا دام پانچ سے چھ ہزار روپے ہے۔

سولا پور کرشی اتپن بازار سمیتی میں آج 250 کوئنٹل پیاز کی درآمد ہوئی۔