مالیگاؤں : قومی پرندہ مور کا شکار، ایک گرفتار

شہر مالیگاؤں کے پوار واڑی پولیس اسٹیشن نے مور کا شکار کرنے والے ایک شکاری کو گرفتار کیا ہے۔ اس کے پاس سے مور اورمور کا پنکھ بھی برآمد کیا گیا ہے۔

مہاراشٹر کے شہر مالیگاؤں کی پولیس نے قومی پرندہ مور کا شکار کرنے کے معاملے میں ایک شخص کو گرفتار کیا ہے۔ اس تعلق سے محکمۂ جنگلات کے افسر نے بتایا کہ پوار واڑی پولیس اسٹیشن کی ایک گاڑی پیٹرولنگ کررہی تھی کہ اس دوران پولیس افسران کو سوند گاؤں پھاٹہ کے قریب ممبئی ۔ آگرہ ہائی وے سے گزر رہی ایک ٹویٹا کار پر شبہ ہوا۔

پولیس اہلکاروں نے جب ٹویٹا کار روک کر اس کی تلاشی لی تو اس میں سے مور اور مور کے پنکھ سمیت ایک ایئر گن برآمد ہوئی۔

محکمہ جنگلات کے افسر ڈی ڈی کامبلے نے اس تعلق سے مزید بتایا کہ اس معاملے میں حذیفہ نامی ایک نوجوان کو گرفتار کیا گیا ہے جس کے بعد پوار واڑی پولیس اسٹیشن کے پی آئی وسنت بھوئی نے اس واقعے کی اطلاع محکمہ جنگلات کو دی۔

جس کے بعد محکمہ جنگلات کے افسران نے ملزم شکاری، گاڑی اور مور کو اپنی تحویل میں لے کر جانچ شروع کردی ہے اور یہ پتہ لگانے کی کوشش کی جارہی ہے کہ یہ شکار کہاں کیا گیا تھا اور اس میں کتنے لوگ شامل تھے۔ اس کے علاوہ جانوروں کے ڈاکٹر کو طلب کرکے پوسٹ مارٹم کی کارروائی بھی انجام دی جارہی ہے۔