Asif Shaikh Rasheed مالیگاؤں کے بدعنوان کمشنر کے خلاف جانچ ایجنسیوں سے شکایت: آصف شیخ

مالیگاؤں میں راشٹر وادی کانگریس پارٹی کے ضلع صدر و سابق رکن اسمبلی آصف شیخ رشید نے میونسپل کمشنر پر مبینہ طور پر بدعنوانی کے معاملے میں ملوث ہونے کا الزام لگایا۔ انہوں نے کہاکہ جانچ ایجنسیوں کو اس معاملے غیر جانبدارانہ تحقیقات کرنے کی ضرورت ہے۔

مالیگاؤں:ریاست میں مہاراشٹر کے مسلم اکثریتی شہر مالیگاؤں میں راشٹروادی کانگریس پارٹی (این سی پی)کے ضلع صدر و سابق رکن اسمبلی آصف شیخ رشید کی جانب سے اردو میڈیا سینٹر پر پریس کانفرنس منعقد کی گئی۔ پریس کانفرنس کو خطاب کرتے ہوئے آصف شیخ رشید نے میونسپل کمشنر کے ذریعے کارپوریشن و شہر کے ہونے والے مبینہ طور پر نقصانات اور بدعنوانیوں پر روشنی ڈالی۔

آصف شیخ رشید نے میونسپل کمشنر پر الزام عائد کرتے ہوئے کہا کہ کارپوریشن اور شہر کو برباد کرنے کے لئے ایسے بدعنوان کمشنر کی تقرری کی گئی ہے۔ کیونکہ موسم ندی سے متصل زیر تعمیر وال کمپاؤنڈ کا 13 کروڑ روپے کا ٹینڈر تھا، لیکن کمشنر نے اس ٹینڈر میں اضافی 24 فی صد کرتے ہوئے ساڑھے تین کروڑ روپے زائد دھولیہ کی کمپنی کو اس کام کو پورا کرنے کے لیے دیا۔شہر کی تعمیر و ترقی کیلئے 100 کروڑ روپے کے ٹینڈر میں اضافی 10 فیصد زائد دیئے گئے، جبکہ یہ اضافی رقم کارپوریشن کے جنرل فنڈ سے دی جاتی ہیں۔

انہوں نے مزید کہا کہ یہ صرف دو مثالیں ہے ایسے بہت سارے ثبوت ان کے پاس موجود ہیں۔ جب سے کمشنر راج آیا ہے تب سے 70 فیصد کاموں کے ٹینڈرس اضافی رقم سے دئے گئے ہیں جو مالیگاؤں شہر کے کروڑوں روپے کو لوٹنے کی تیاری کررہا ہے ۔اس کمشنر پر ہمیں بھروسہ نہیں ہے یہ شہر کو لوٹنے آیا ہے۔

ایک سوال میں آصف شیخ نے کہا کہ کمشنر کے تمام کاموں کی شکایت لیکر ہم ممبئی میں اینٹی کرپشن بیورو چیف سے شکایت کریں گے۔اسی طرح مہاراشٹر حکومت کے شہری ترقیات کو شکایت کروں گا اور مالیگاؤں کارپوریشن کے کمشنر و ڈیوژنل کمشنر اور پولس ڈپارٹمنٹ کو بھی شکایات کی۔اسی کیساتھ ای ڈی میں بھی شکایت کی جائے گی۔