ممبئی: مسلمانوں کو نشے کی لت سے دور رکھنے کی انوکھی پہل

ممبئی میں مسلم معاشرے میں نشے کی لت سے نوجوانوں کو بچانے کے لیے اب مسلم رہنماؤں نے پہل کی ہے جس میں اب مساجد میں نشے کی لت اور اس کے نقصانات کے بارے میں بتایا جائے گا۔

نوجوانوں کو نشے کی لت سے دور کرنے کے لیے مساجد اور دیگر تقریبات کے دوران منشیات سے ہونے والے نقصانات سے بیدار کیا جائے گا۔ اُنہیں قرآن اور حدیث کے حوالے سے روشناس کرایا جائے تاکہ ان میں نشے کے نقصانات اور شرعی اعتبار سے گناہ کیا ہیں اس کے بارے میں پتہ معلومات ہوسکے۔

ممبئی کی جامع مسجد کے چیف قاضی مفتی اشفاق قاضی نے کہا کہ 'اب ہمیں مساجد کے ساتھ ساتھ دوسری تقاریب کے دوران بھی نوجوانوں کو اس سے بیدار کرنے کی ضرورت ہے کیونکہ حالیہ کارروائیوں میں مسلم افراد زیادہ اس لت میں دکھائی دے ہے ہیں۔

حال ہی میں نارکوٹکس کنٹرول بیورو کے زونل ڈائریکٹر سمیر وانکھیڈے نے جامع مسجد ممبئی میں اپنے خطاب کے دوران کہا کہ سماج کا ہر طبقہ اگر اس سے بیدار کرنے کے لیے اٹھ کھڑا ہو تو یقین کر لیجئے ایک وقت ایسا بھی آئے گا جب نشے سے معاشرے کو آزادی ملیگی اور ایک بہتر معاشرے کی تشکیل ہوگی۔

جنوبی ممبئی میں ڈونگری، ناگپاڑہ، بھنڈی بازار اور پائیدھونی یہ تمام مسلم اکثریتی علاقے ہیں اور یہاں منشیات کی خرید و فروخت ساتھ ساتھ منشیات کے عادی نوجوانوں کی تعداد خاصی ہے جس پر وقت رہتے اگر قابو نہیں پایا گیا تو آئندہ نسلیں تباہی کے دہانے پر ہوں گی۔