کمبھ میلہ سے لوٹنے والے ملک بھر میں کورونا کا پرساد بانٹیں گے: ممبئی میئر

برہن ممبئی میونسپل کارپوریشن کی میئر کشوری پیڈنیکر نے اتراکھنڈ کے ہریدوار میں چل رہے کمبھ میلہ پر شدید ردعمل کا اظہار کیا۔

ممبئی میئر کشوری پیڈنیکر نے کہا کہ کمبھ میلہ سے لوٹنے کے بعد عقیدت مند سارے ملک میں کورونا کو 'پرساد' کی طرح بانٹیں گے۔

انہوں نے ریاستوں پر کمبھ میلہ سے لوٹنے والوں کو کورنٹائن کرنے کے انتظامات کرنے پر زور دیا۔

ممبئی میئر نے یہ بھی انکشاف کیا کہ بی ایم سی کی جانب سے کمبھ میلہ سے واپس لوٹنے والوں کو کورنٹائن میں رکھنے کا منصوبہ تیار کیا جارہا ہے۔

ممبئی میں کورونا کی بگڑتی صورتحال پر تبصرہ کرتے ہوئے کشوری پیڈنیکر نے کہا کہ 95 فیصد لوگ گائیڈ لائن پر سختی سے عمل کر رہے ہیں لیکن 5 فیصد لوگ پابندیوں کی خلاف ورزی کرتے ہوئے دوسروں کیلیے پریشانی پیدا کر رہے ہیں۔

میئر نے ممبئی میں کورونا کیسز میں بے تحاشہ اضافہ کو روکنے کے لیے شہر میں مکمل لاک ڈاون نافذ کرنے کی حمایت کی۔