ممبرا میں مکان منہدم

مہاراشٹر کے دارالحکومت ممبئی اور مضافات میں گزشتہ کئی روز سے جاری موسلادھار بارش کے سبب سیلابی کیفیت پیدا ہوگئی ہیں، جبکہ کچھ جگہوں پر مکانات منہدم ہونے کی خبریں بھی موصول ہو رہی ہیں۔

ممبئی سے متصل مسلم اکثریتی علاقہ ممبرا میں تیز بارش کے سبب مکان منہدم ہوگیا، مکان گرنے کے آہٹ محسوس ہوتے ہی اس میں موجود افراد فوراً باہر نکل گئے جس کے سبب کوئی بھی جانی نقصان نہیں ہوا۔

ممبرا کے سمراٹ نگر کے شیو شرن ورما چال کے قریب ایک منزلہ مکان اچانک منہدم ہوگیا، مکان مالک جئے یادو کے مطابق رات تین بجے مکان کی دیواروں میں شگاف پڑنے لگے تھے اور مکان آہستہ آہستہ جھکنے لگا تھا، اس آہٹ سے گھر میں موجود افراد کی نیند کھل گئی اور سبھی لوگ فوراً باہر نکل آئے، جیسے ہی تمام افراد باہر نکلے چند ہی منٹوں میں مکان پوری طرح سے منہدم ہوگیا۔

اس حادثے میں کسی بھی قسم کا جانی نقصان نہیں ہوا۔

حادثہ کی اطلاع ملتے ہی فائر بریگیڈ و میونسپل حکام کا عملہ جائے وقوع پر پہنچ کر حالات کا جائزہ لیا، واضح رہے کہ ممبرا کے پہاڑ اور اسکے دامن میں آباد رہائشی مکانات پر مٹی کے تودوں کے گرنے کے سبب اس طرح کے واقعات رونما ہوتے ہیں۔