ممبئی: جے جے ہسپتال میں کووڈ 19 ایمرجنسی وارڈ کی شروعات

ریاست مہاراشٹر کے دارالحکومت ممبئی میں واقع جے جے ہسپتال میں اب کووڈ 19 کے مشتبہ مریضوں کے لیے ایمرجنسی وارڈ کی شروعات کی گئی ہے۔

جے جے ہسپتال کو پہلے نان کووڈ اسپتال میں تبدیل کر دیا گیا تھا اور اسی بات کا فائدہ اٹھا کر یہاں کی انتظامیہ نے مریضوں کا علاج کرنے سے صاف انکار کر دیا تھا اور ہسپتال میں مریضوں کے لیے دروازے بند ہونے وجہ سے عوام کو بڑی دقتوں کا سامنا کرنا پڑتا تھا۔

علاقے کے رکن اسمبلی امین پٹیل نے بتایا کہ 'اب ایسے مریض جن پر کورونا وائرس کے خطرات ہوں انہیں بلا تاخیر یہاں کے ایمرجنسی وارڈ میں بھرتی کیا جا سکتا ہے اور یہاں جانچ ہونے کے بعد اگر مریض کورونا وائرس کا شکار ہے تو اسے دوسرے ہسپتالوں منتقل کیا جائے گا۔

واضح رہے کہ اس سے قبل نان کووڈ ہونے کی وجہ سے کئی مریضوں نے ہسپتال کی لاپرواہی اور بروقت علاج نہ ملنے کی وجہ سے دم توڈ دیا تھا۔

ای ٹی وی بھارت نے جے جے اسپتال انتظامیہ کی مریضوں کے ساتھ لاپرواہی کی رپورٹ شائع کی تھی جس کے بعد حکومت نے اسے سنجیدگی سے لیا تھا۔