ممبئی کرائم برانچ کی اینٹی نارکوٹک سیل نے منشیات مخالف مہم کے تحت اب تک کی سب سے بڑی کارروائی کی ہے، ممبئی کرائم برانچ کے جوائنٹ کمشنر ملند بھرامبے نے بتایا کہ ممبئی اینٹی نارکوٹک سیل نے 1800 کلو گانجا ضبط کیا ہے۔
اینٹی نارکوٹک سیل نے گانجے کے ساتھ دو لوگوں کو گرفتار کیا موصولہ اطلاعات کے مطابق بھارتی بازار میں اس کی قیمت ساڑھے تین کروڑ سے زائد بتائی جا رہی ہے، منشیات فروش اس کاروبار کو بڑی ہی چالاکی سے انجام دیتے تھے ۔
بتایا جاتا ہے کہ اس گانجے کو ٹیمپو کی مدد سے ممبئی لایا جاتا تھا پوری ٹیمپو میں ناریل ہوا کرتا تھا، تاکہ کسی کو اس پر شک نہ ہو سکے، لیکن گزشتہ کئی دنوں سے اینٹی نارکوٹک سیل کے افسران اس راز کو فاش کرنے میں مصروف تھے۔
کڑی مشقت کے بعد نہ صرف گانجا ضبط گیا بلکہ اس پیشے سے منسلک دو افراد کی گرفتاری بھی عمل میں آئی۔
اتنی زیادہ مقدار میں یہ گانجا اڈیسہ سے ممبئی لانے کے بعد اسے بھیونڈی کے ایک گودام میں رکھ دیا جاتا تھا، اس کے بعد ممبئی کے مقامی مارکیٹ میں اسکی سپلائی کی جاتی تھی۔
کرائم برانچ کے مطابق منشیات کا یہ کاروبار گزشتہ پانچ برسوں سے انجام دیا جارہا تھا اور اس کاروبار میں کئی لوگ شامل ہیں، ممبئی کرائم برانچ کے جوائنٹ ملند بھرامبے نے اس بات کا دعوہ کیا ہے کہ جانچ کا دائرہ جیسے جیسے سخت ہوگا اس معاملے میں اور بھی کئی گرفتاریاں ہونگی۔
