'ممبئی اور پونے شہر 10 دن تک بند اور فوج تعیناتی کی خبر گمراہ کن'

مہاراشٹر کے وزیر داخلہ انیل دیشمکھ ان تمام باتوں کو مسترد اور گمراہ کن قرار دیا جس میں کہا جا رہا تھا کہ کورونا مریضوں کی بڑھتی تعداد کے پیش نظر ممبئی اور پونے اگلے ہفتہ سے اگلے 10 دن کے لیے بند رہیں گے اور دونوں شہر مکمل طور پر فوج کے ماتحت ہوں گے۔

مہاراشٹر میں دن بدن کورونا وائرس کے مریضوں کی تعداد میں اضافہ ہو رہا ہے اس لیے سوشل میڈیا پر ایک پیغام تیزی سے وائرل ہو رہا ہے کہ کورونا وائرس کے بڑھتے معاملات کے باعث ممبئی اور پونے 10 دنوں کے لیے بند رہیں گے اور وہاں فوج تعینات رہے گی۔

اس تعلق سے ریاستی حکومت کی جانب سے وزیر داخلہ انل دیشمکھ کے ذریعے وضاحت کی گئی کہ یہ پیغام مکمل طور پر غلط ہے، اس کا مقصد افواہوں پھیلانا ہے، انہوں نے لوگوں سے اپیل کی ہے کہ وہ اس پر یقین نہ کریں۔

انیل دیشمکھ نے کہا کہ 'واٹس ایپ اور دیگر سوشل میڈیا پلیٹ فارم کے ذریعہ افواہیں پھیلائی جارہی ہیں کہ ممبئی اور پونے میں فوج تعینات کی جائے گی، فوج دس دن کا کرفیو نافذ کرے گی یہ سراسر غلط ہے۔ مہاراشٹر سائبر کرائم نے اس افواہ کو پھیلانے والوں کے خلاف کارروائی کا آغاز کردیا ہے۔

ریاست میں کورونا وائرس کی زنجیر توڑنے کے لیے لاک ڈاؤن میں 31 مئی تک توسیع کردی گئی ہے ساتھ ہی لاک ڈاؤن کے چوتھے مرحلے کے دوران پابندیاں سخت کردی گئی ہیں۔

ممبئی، تھانے، نوی ممبئی، پنویل، کلیان۔ڈومبیولی، پونے، ناسک، اورنگ آباد، جلگاؤں اور ناگپور میں مریضوں کی تعداد میں مسلسل اضافہ ہورہا ہے جو تشویش کی بات ہے۔

ریاستی حکومت نے کہا کہ ممبئی اور پونے میں فوج کی تعیناتی اور 10 دنوں تک مکمل بند کی یہ پوسٹ گمراہ کن، یہ واضح کیا گیا ہے کہ کسی کو بھی اس پر یقین نہیں کرنا چاہیے اور عوام کو خوفزدہ نہیں ہونا چاہیے۔