سفر حج کے ارادے سے محمد آفاق 11 مارچ کو ممبئی سے روانہ ہو چکے ہیں۔ اس دوران مدھیہ پردیش کے دارالحکومت بھوپال میں ای ٹی وی بھارت نے ان سے بات چیت کی۔
محمد آفاق لاری بھوپال سے دہلی اور دہلی سے پاکستان، ایران، عراق، کویت، اور اردن کے راستے سعودی عرب پہنچیں گے۔ ایک اندازے کے مطابق ان کا یہ سفر تقریبا ساڑھے چار ماہ میں مکمل ہوگا۔
محمد آفاق نے بتایا کہ سنہ 2013 سے انہوں نے بذریعہ سڑک سائیکل سے سفر حج پر جانے کی کوشش شروع کی تھی، لیکن کچھ تکنیکی وجوہات کی بنیاد پر ان کی یہ خواہش پوری نہیں پائی ۔ لیکن اب محمد آفاق لاری کے ساتھ اس سفر پر چار دیگر افراد بھی شریک ہیں۔
دارالحکومت دہلی میں انھیں وزارت خارجہ کی جانب سے چھ ماہ کا سیاحتی ویزا فراہم کیا جائے گا۔
سائیکل سے سفر حج پر جانے والے محمد آفاق لاری صاحب نے کہا جہاں مجھے اس بات کا جنون ہے کہ میں سائیکل سے حج پر جا کر اللہ کو راضی کروں، وہیں میرا مقصد یہ بھی ہے کہ میں اس مقدس جگہ جاکر وطن عزیز کے لیے امن و عافیت اور خوشحالی کی دعا کروں۔
ای ٹی وی بھارت کے اس سوال پر کہ انہیں سائیکل سے حج پر جانے کا خیال کیسے آیا تو انہوں نے کہا 2002 میں ممبئی سے ایک شخص سائیکل سے حج پر نکلا تھا، اسی روز سے میری تمنا تھی کہ میں سائیکل سے حج پر جاؤں اور اللہ کو راضی کروں۔
انہوں نے کہا میرے اہل خانہ اور میرے فرزند چاہتے تھے کہ میں ہوائی جہاز سے سفر حج پر جاؤں، لیکن میری تمنا کے آگے سب راضی ہوگئے اور خوشی سے انہوں نے سائیکل سے سفر حج پر روانہ کیا۔
محمد آفاق نئی ممبئی روڈ پر گونڈی علاقے میں رہتے ہیں۔ وہ جوتے چپل کے کاروبار سے وابستہ ہیں۔ ان کے دو فرزند انجینیئر ہیں۔
