مالیگاؤں کے پہلے ریڈیو جاکی سے ملاقات

موجودہ انٹرنیٹ اور سوشل میڈیا کے دور میں آج بھی بے شمار لوگ ایسے ہیں جو ریڈیو پر خبریں اور دیگر چیزیں سننا پسند کرتے ہیں اور ریڈیو کا شعبہ روز بہ روز ترقی کر رہا ہے، بڑے شہروں سے لے کر چھوٹے شہروں اور گاؤں تک ریڈیو عام ہوچکا ہے۔

ریاست مہاراشٹر میں اردو کے متوالوں کا شہر کہلانے والے مالیگاؤں میں بھی گزشتہ ایک دہائی سے ریڈیو ایف ایم کی خدمات کامیابی کے ساتھ جاری ہے۔

ریڈیو جاکی جئیش سونونے عرف آر جے جئے مالیگاؤں کے رہنے والے ہیں اور ان کی مادری زبان مراٹھی ہے، موصوف نے پونہ شہر سے میکانیکل انجینیئرنگ بعد ازاں جرنلزم میں پوسٹ گریجویشن ڈپلومہ کی تعلیم ایم ایس جی کالج سے مکمل کی اس کے بعد ریڈیو ایف ایم میں قسمت آزمانے کا موقع ملا۔

مالیگاؤں کے اولین ریڈیو ایف ایم پر مختلف زبانوں میں مختلف پروگرامز ترتیب دیئے ہوئے ہیں، جس میں خصوصاً اردو پروگرام بعنوان 'لفظوں کے موتی' پر روزانہ دوپہر 3 تا 4 بجے کے درمیان آر جے جئے سونونے اپنی خدمات انجام دیتے ہیں۔

مہاتما گاندھی ودیا مندر ادارہ کے زیر اہتمام کمیونٹی ریڈیو خدمات بنام ریڈیو مست ایم ایف 90.4 اسٹیشن (کیمپ) میں واقع ہے، اس ریڈیو کی حد پچاس کلومیٹر کے دائرے میں محیط ہے۔

آر جے جئے نے بتایا کہ 'ریڈیو پر مراٹھی اور ہندی کے علاوہ اردو زبان میں ایک خاص پروگرام 'لفظوں کے موتی' کو لوگ بہت پسند کرتے ہیں۔

انہوں نے کہا کہ 'لوگ مجھ سے اردو میں بات کرتے ہیں اور انہیں میری آواز و مکالمے بھی پسند آتے ہیں نیز ہر جمعہ کو دوپہر میں اردو ادب سے وابستہ مختلف شخصیات کو ریڈیو پر مدعو کیا جاتا ہے اور ان سے مختلف سماجی، تعلیمی و ثقافتی موضوعات پر گفتگو کی جاتی ہے۔