مہاراشٹر میں کورونا وائرس کو لیکر ہونے والے لاک ڈاون کے اعلان کے بعد سے ہی ریاست کے سبھی شادی ہال کو بند کرتے ہوئے سبھی طرح کی تقریبات پر مکمل طور سے پابندی عائد ہے۔
تجارتی شہر الہاس نگر میں لاک ڈاؤن اور کرفیو کے بعد بھی ایک شادی کی تقریب کا انعقاد کیا جارہا تھا۔ جس کی اطلاع موصول ہوتے ہی مقامی پولیس نے پہنچ کر دولہا دولہن اور باراتیوں کو پولیس تھانہ لے جا کر 188 سمیت مختلف دفعات کے تحت کاروائی کرتے ہوئے سبھی باراتیوں کو ہوم کورنٹائن بھیج دیا ہے۔
الہاس نگر کیمپ نمبر 5 کے دشہرا میدان میں چل رہی ایک شادی کی تقریب کی اطلاع موصول ہوتے ہی الہاس نگر پولیس تھانہ کے سینئر پولیس انسپکٹر سنجے ساونت اپنی پولیس ٹیم کے ساتھ جائے وقوع پر پہنچ کر اس تقریب کو فوراً روک دیا 15 سے زیادہ باراتیوں اور دولہا دولہن کو پولیس وین میں تھانہ لے گئی۔
مہاراشٹر میں تمام شادی ہال اور میدان پر روک لگانے کے ساتھ ہی چار 5 افراد سے زیادہ سڑکوں پر گھومنے پر پابندی عائد ہے۔ مگر اس کے بعد بھی الہاس نگر میں کھلے عام ایک میدان میں شادی کی تقریب نے سب کو حیران کردیا ہے۔ کیوں کہ اس شادی میں کئی درجن افراد شامل تھے مگر پولیس کو پہنچتا دیکھ کچھ فرار ہونے میں کامیاب ہوگئے۔ فی الحال پولیس نے حراست میں لیے گئے 15 باراتیوں اور دولہا دولہن کو ان کے گھروں میں ہوم کورنٹائن کردیا ہے۔
