مہاراشٹر کے شہر مالیگاؤں کی بُنکر تنظیموں کی جانب سے مختلف مطالبات کے سلسلے میں 22 جون بروز منگل سے شہر کی پاورلوم صنعت کو غیر معینہ مدت تک بند کرنے کا فیصلہ کیا گیا ہے۔ اس فیصلے پر شہر کی کئی پاورلوم تنظیموں نے حمایت کا اعلان بھی کیا ہے لیکن اسکے برعکس شہر کی مزدور یونین بھی مزدوروں کی تنخواہ کے معاملے میں میدان میں آگئی ہیں۔
اس درمیان شہر میں پاورلوم بند کرنے کے فیصلے کے تعلق سے کسی طرح کا کوئی تنازع پیدا نہ ہو اس مقصد کے تحت پولیس انتظامیہ کی جانب سے معقول پولیس بندوبست بھی کیا جائے گا۔
وہیں آج شہر کے ایڈیشنل ایس پی چندر کانت کھانڈوی کی جانب سے ایک پریس نوٹ جاری کی گئی جس میں 22 جون سے غیر معینہ مدت بند تک ہونے والے پاورلوم کارخانوں کے متعلق تفصیلات پیش کرتے ہوئے ہدایت دی گئی ہے کہ پاورلوم کاروبار بند کے دوران کسی بھی کارخانے کو جبراً بند کروانے کی کوشش نہ کی جائے۔
یہ بھی پڑھیں:مالیگاؤں: عیدالاضحیٰ سے متعلق رکن اسمبلی کی اپیل
نوٹس میں لکھا گیا ہے 'اگر کسی شخص یا پاورلوم تنظیموں کی جانب سے زبردستی پاورلوم کارخانہ بند کروانے کی شکایات موصول ہوتی ہیں تو پولیس کی جانب سے ایسے افراد اور تنظیموں کے خلاف کارروائی کی جائے گی۔ اس تعلق سے پولیس انتظامیہ کی جانب سے شہر کی تمام پاورلوم تنظیموں کو ایک نوٹس دی جا چکی ہے۔ لہٰذا پاورلوم بند کے دوران پولیس انتظامیہ کا تعاون کریں'۔