مالیگاؤں کا سونے چاندی والا تعزیہ پورے بھارت میں مشہور

تعزیہ داری کی تاریخ بہت قدیم ہے، ابتداء میں کھجور کی چھڑوں اور بانسوں سے تعزیہ تیار کیا جاتا تھا۔ رفتہ رفتہ تعزیوں کی تیاری میں بھی جدت آنا شروع ہوگئی اور تعزیے کی تیاری کے لیے دور جدید میں سونا، چاندی اور دیگر اشیاء استعمال ہونے لگیں۔

بھارتی ریاست مہاراشٹر کے دارالحکومت ممبئی سے 290 کلو میٹر دور واقع پاورلوم کارخانوں کے اس صنعتی شہر مالیگاؤں میں کئی دہائیوں سے شیعہ سنی مل جل کر تعزیہ داری کرتے آرہے ہیں۔ اسی نسبت سے مالیگاؤں کے چاندنی چوک میں رنگین پتوں اور خوبصورت جھالروں کی سجاوٹ کے درمیان ایک خوبصورت سونے چاندی والا یہ تعزیہ لوگوں کی توجہ کا مرکز رہتا ہے۔

اس تعلق سے تعزیہ دار حافظ محمد اسماعیل چشتی نے بتایا کہ انجمن خدام اہل بیت سنہ 1947 سے ان کے پردادا حاجی محمد حسین نے اس چاندی والے تعزیہ کی بنیاد رکھی۔ محمد اسماعیل چشتی 58 برس کے ہیں اور بچپن سے ہی اس تعزیے کی دیکھ ریکھ کررہے ہیں۔ ان کا کہنا ہے کہ ابتداء میں یہ تعزیہ صرف 6 انچ کا تھا۔ پھر جمع ہوئے نیاز کے پیسوں سے آج اس تعزیہ میں 20 کلو چاندی لگایا جاچکا ہے اور اس کا اوپری حصہ سونے کا بنا ہوا ہے اور نیچے کا حصہ چاندی کا ہے۔ اس مناسبت سے یہ پورے بھارت میں مشہور ہے اور دور دور سے لوگ اس کی زیارت کے لیے آتے ہیں۔

مالیگاؤں کی سونے چاندی والی تعزیہ پورے بھارت میں مشہور

انہوں نے تعزیہ بنانے کے مقصد کے بارے میں بتایا کہ یہ تعزیہ حضرت امام حسینؓ کی نسبت میں بنایا گیا ہے۔ لوگوں کی اس میں بہت عقیدت ہے اور عورتیں بطور خاص اپنے بچوں کی سلامتی اور صحت کے لیے انہیں اس تعزیے کے نیچے سے نکالتی ہیں۔'

• محمد اسماعیل چشتی نے بتایا کہ تعزیہ ان کے خاندان کی نگرانی میں تیار کیا گیا ہے۔ اس کی دیکھ ریکھ کے لیے ایک شخص ہمہ وقت تعینات رہتا ہے جو تعزیے پر مسلسل گلاب کے پھول کے ساتھ ساتھ عطر کا چھڑكاؤ کرتا رہتا ہے اور محرم کے دن کربلا کے لیے روانگی سے قبل دعا کرنے کے بعد اس تعزیہ کو حفاظت کے ساتھ ایک محفوظ کمرے میں رکھ دیا جاتا ہے۔ انہوں نے مزید کہا کہ رواں برس حکومت کی جاری کردہ کورونا ہدایت پر عمل کرتے ہوئے ہی ملک میں محرم منایا جارہا ہے۔ اس لیے امسال تعزیہ کے اطراف مناسب سجاوٹ کی گئی ہے۔