کہا جاتا ہے کہ شب برات سے لے کر بقرعید تک بہار اور اترپردیش کے درزی مالیگاؤں میں قیام کرتے ہیں اس دوران وہ کپڑے سی کر اچھی رقم جمع کرتے ہیں۔
اس وقفہ کو یعنی شب برات سے بقرعید تک کے وقفہ کو مقامی زبان میں 'سیزن' بھی کہا جاتا ہے۔ ان ایام میں بڑی تعداد میں شمالی ہند کے ٹیلر حضرات مالیگاؤں کا رخ کرتے ہیں۔
لاک ڈاؤن اور کورونا وبا ہونے کے باوجود رواں برس بھی بڑی تعداد میں درزیوں نے مالیگاوں شہر کا رخ کیا ہے کیونکہ انہیں یہاں بآسانی کام اور بہتر اُجرت ملتی ہے۔ اس لیے وہ لگن و دل جمعی کے ساتھ کام کرتے ہیں۔
واضح رہے کہ تہواروں کے ان ایام میں بیرون ریاست سے تعلق رکھنے والے درجنوں افراد کپڑے، چپل - جوتے اور دیگر چھوٹا موٹا کاروبار کرنے کی غرض سے بھی مالیگاؤں آتے ہیں کیونکہ مسلم اکثریتی شہر اور تہوارکے سبب ان کا کاروبار ہوجاتا ہے اور یہاں سے وہ اچھی خاصی رقم کے ساتھ ہنسی خوشی اپنے گھر لوٹ جاتے ہیں۔
