'شیوسینا بی جے پی کے درمیان جو فیصلہ ہوا اسے عوام کو بتائیں'

بی جے پی کے سینیئر رہنما ایکناتھ کھڈسے نے کہا کہ اسمبلی انتخابات سے قبل بی جے پی- شیوسینا کے درمیان جو شرائط رکھی گئی تھی اسے عوام کے سامنے پیش کیا جائے۔

ریاست مہاراشٹر میں اسمبلی انتخابات کے نتائج کے اعلان کے بعد سے بی جے پی اور شیوسینا کے درمیان حکومت سازی کے لیے رشہ کشی جاری ہے۔

شیوسینا کے اعلی رہنماؤں نے دعویٰ کیا ہے کہ بی جے پی نے ریاست میں 21 اکتوبر کو ہونے والے اسمبلی انتخابات سے قبل وزیراعلی کے عہدے 50-50 فارمولے پر اتفاق کیا تھا۔

تاہم ، بی جے پی نے ادھو ٹھاکرے کی زیرقیادت پارٹی کے ساتھ اس طرح کے انتظامات سے انکار کیا ہے اور اس پر زور دیا ہے کہ وزیر اعلی دیویندر فڑنویس پوری مدت کے لیے اس عہدے پر فائز رہیں گے۔

کھڈسے نے جلگاؤں میں صحافیوں سے بات کرتے ہوئے کہا کہ ماضی میں شیوسینا بی جے پی کے مابین جو بھی طے شدہ فیصلہ ہوا تھا اسے اقتدار میں بانٹنے کے معاملے کو بہتر طور پر سمجھنے کے لیے عام کیا جانا چاہیے۔

بی جے پی نے کھڈسے کو اسمبلی انتخابات میں ٹکٹ نہیں دیا تھا بلکہ ان کی بیٹی روہینی کھڈسے کو ٹکٹ دیا تو وہ شیوسینا کے باغی چندرکانت پاٹل سے ہار گئیں۔

کھڈسے نے کہا کہ شیوسینا کے رہنما یہ کہتے رہے ہیں کہ لوک سبھا انتخابات سے قبل ان سے کچھ وعدہ کیا گیا تھا۔ اس معاملے میں جو بھی فیصلہ کیا گیا اسے سامنے لایا جانا چاہیے اور اس پر تبادلہ خیال کیا جانا چاہیے۔

واضح رہے کہ شیوسینا بی جے پی کے درمیان وزیرا علی کے عہدے کےلیے رشہ کشی جاری ہے۔

مہاراشٹر اسمبلی انتخابات کے نتائج کا اعلان 24 اکتوبر کو کیا گیا تھا جس میں بی جے پی سب سے بڑی پارٹی بن کر ابھری تھی۔ بی جے پی کو 105 شیوسینا 56 این سی پی 54 اور کانگریس 44 سیٹوں پر جیت حاصل کی تھی۔