راج ٹھاکرے کے حامی کی خودکشی

مہاراشٹر نونرمان سینا کے سرگرم رکن پروین چوگلے نے مبینہ طور پر گزشتہ شب اس وجہ سے خودکشی کر لی کیوں کہ پارٹی سربراہ راج ٹھاکرے کو انفورسمینٹ ڈائریکٹوریٹ (ای ڈی) نے نوٹس جاری کی تھی۔

مہاراشٹر کے دارالحکومت ممبئی سے متصل تھانے شہر کے کلوا علاقے میں گزشتہ شب تقریباً 10 بجے ایم این ایس کارکن پروین چوگلے نامی نوجوان نے خود کو آگ لگا کر خودکشی کرلی۔

تفصیلات کے مطابق پروین چوگلے نامی شخص ایم این ایس صدر راج ٹھاکرے کا مداح تھا اور راج ٹھاکرے کے تمام جلسے اور ریلیوں میں شرکت کرتا تھا اور راج ٹھاکرے جہاں بھی پارٹی کی تشہیر کے لیے جاتے وہ رنگوں سے اپنےجسم پر ایم این ایس کا پرچم بنا کر پہنچ جاتا تھا۔

انفورسمینٹ ڈائریکٹوریٹ نے جب راج ٹھاکرے کو سمن دے کر 22 اگست کو پوچھ تاچھ کے لیے نوٹس جاری کیا تب سے ہی مذکورہ شخص پریشان تھا اور اس نے سوشل میڈیا پر اس تعلق سے ایک پوسٹ کی تھی جس میں تحریر تھا کہ اے بی سی ڈی اپنے گھر پر سکھائیں، اگر کرشن کنج(راج ٹھاکرے کا مکان) پر قدم بھی رکھا تو ای ڈی کو بیڑی بناکر آگ لگا دیں گے'۔

پارٹی کے مقامی رہنماؤں کے مطابق اس پوسٹ کے بعد پروین نے خود کو آگ لگا لی، جس کے بعد اسے جھلسی ہوئی حالت میں ہسپتال لے جایا گیا جہاں 80 فیصد جھلس جانے کی وجہ سے اس کی موت واقع ہوئی گئی۔

اس معاملے میں کلوا پولیس نے حادثاتی موت کا معاملہ درج کر کے تحقیقات شروع کردی ہے۔

تھانے پولیس کے ایڈیشنل پولیس کمشنر نے اس بابت بتایا کہ مذکورہ کارکن اس سے قبل بھی متعدد مرتبہ خودکشی کی کوشش کر چکا ہے۔