رکن پارلیمان پر جان لیوا حملہ

ریاست مہاراشٹر کے ضلع عثمان آباد میں شیوسینا کے رکن پارلیمان اوم راجے نمبالکر پر اسمبلی انتخابات کی تشہیری مہم کے دوران ایک شخص چاقو سے حملہ کر کے فرار ہوگیا۔

مہاراشٹر میں اسمبلی انتخابات کی سرگرمیاں عروج پر ہیں اور سیاسی جماعتوں کی جانب سے ایکدوسرے پر الزام تراشیوں کا سلسلہ بھی ہنوز جاری ہے اسی دوران عثمان آباد ضلع میں رکن پارلیمان پر حملہ کرنے کا سنسنی خیز واقعہ پیش آیا ہے۔

تفصیلات کے مطابق شیوسینا کے رکن پارلیمان اوم راجے نمبالکر ریاست میں اسمبلی انتخابات کے پیش نظر عثمان آباد کے پڈولی گاؤں میں اپنی پارٹی کے امیدوار کیلاش پاٹل کے لیے تشہیر مہم میں شریک تھے۔

مہم کے دوران ہجوم میں سے ایک شخص اوم راجے کے قریب آیا، پہلے اس نے اوم راجے سے ہاتھ ملایا اس کے بعد دوسرے ہاتھ میں چھپے ہوئے چاکو سے ان پر حملہ کر دیا۔

حملے میں اوم راجے کے ہاتھ اور پیٹ پر زخم آئے ہیں جس کے بعد انہیں قریبی ہسپتال میں داخل کرایا گیا ہے۔

اس واقعہ کے بعد وہاں افرا تفری کا ماحول پیدا ہوا اور حملہ آور وہاں سے فرار ہونے میں کامیاب ہوگیا۔

اس حملے کے بعد فوراً پولیس وہاں پہنچ گئی ہے اور حملہ آور کی تلاش کر رہی ہے۔