مزدور وطن واپسی کے لیے بضد

ریاست مہاراشٹر میں دیگر ریاستوں کے مزدور بڑی تعداد میں ملک میں لاک ڈاؤن ہونے کی وجہ سے پھنسے ہوئے ہیں۔

پولیس کے مطابق تقریبا ایک ہزار مزدور ہفتہ کے روز مہاراشٹر کے چندر پور میں سڑکوں پر آئے تھے اور یہ مطالبہ کیا کہ انہیں گھر جانے کی سہولت فراہم کی جائے۔

ایک عہدیدار نے بتایا کہ یہ واقعہ صبح 9 بجکر 30 منٹ پر ضلع کے بلارپور میں پیش آیا۔

خیال رہے کہ یہ تمام مزدور ایک سرکاری میڈیکل کالج میں گذشتہ ایک ماہ سے زائد سے قیام پذیر تھے۔

انہوں نے ہائی وے کو روکنے کی کوشش کی اور ریلوے اسٹیشن کی طرف کوچ کرنا شروع کیا۔

پولیس اہلکار کے مطابق زیادہ تر مزدور اتر پردیش اور بہار میں اپنے آبائی شہر واپس جانا چاہتے ہیں۔

ان میں سے کچھ کا تعلق مغربی بنگال سے بھی ہے۔

عہدیدار نے بتایا کہ لاک ڈاؤن کی وجہ سے انہیں مشکلات کا سامنا کرنا پڑ رہا ہے کیونکہ ان کی آمدنی کا ذریعہ رک گیا ہے۔

الرٹ ہونے پر رام نگر پولیس اسٹیشن کے اہلکار موقع پر پہنچ گئے اور صورتحال کو قابو میں کرلیا گیا۔

اس کے بعد مزدور واپس ہوگئے۔

اس موقع پر پولیس اہلکار نے ان سے کہا کہ مزدوروں کو ان کے گھروں تک پہنچانے کا نظم کیا جا رہا ہے، جو جلد شروع ہو جائے گا۔