مالیگاؤں: 'کمشنر کے خلاف ووٹ دینے کیلئے مشروط طور پر تیار'

متحدہ محاذ کے رابطہ کار اور جنتا دل سیکولر کے سیکریٹری مستقیم ڈگنیٹی نے ایک پریس کانفرنس میں کہا کہ مالیگاؤں میونسپل کارپوریشن میں برسر اقتدار پارٹیاں، خاص طور سے کانگریس اگر کمشنر کے خلاف عدم اعتماد کی تجویز پیش کرتی ہے تو اس کے ساتھ واٹرگریس اور بائیو مائننگ کا ٹھیکہ رد کرنے ساتھ ہی گرنا ڈیم پمپنگ اسٹیشن کا ٹینڈر بھی رد کرنے کی تجویز بھی شامل کرے تب ہی متحدہ محاذ اس تجویز کی مکمل حمایت کرے گا۔

مستقیم ڈگنیٹی نے کہا کہ جنتا دل شروع سے موجودہ کمشنر کے مخالف رہی ہے کیونکہ کورونا متاثرین کے علاج کے لیے ٹینٹ لگانے سے لے کر آج تک ہم کمشنر سے بر سر پیکار رہے ہیں جبکہ بہت سے لوگ اس وقت کمشنر کی حمایت کررہے تھے۔

مستقیم ڈگنیٹی نے بر سراقتدار جماعت پر نکتہ چینی کرتے ہوئے کہا کہ بر سر اقتدار جماعت نے کمشنر کے خلاف عدم اعتماد کی تجویز پیش کرنے کی تیاری کرلی تھی لیکن شیوسینا رہنما و ریاستی وزیر دادا بھسے کے دباؤ میں آکر یہ تجویز پیش نہیں کی گئی۔

انھوں نے سوال کرتے ہوئے کہا کہ کیا دادا بھسے اس بدعنوان کمشنر کی سر پرستی کررہے ہیں؟ اس کا انکشاف سابق رکن اسمبلی شیخ رشید کو کرنا چاہیے کیونکہ شیوسینا اقتدار میں حصہ دار ہے اور شیوسینا کو بھی کمشنر کے تعلق سے اپنی پالیسی واضح کرنی ہوگی۔

انھوں نے مزید کہا کہ تجویز عدم اعتماد کے تعلق سے جنتادل اور متحدہ محاذ اب محتاط ہوگیا ہے کہ پہلے کی طرح برسر اقتدار پارٹیاں دوبارہ سے دھوکہ تو نہیں دیں گی؟

ڈگنیٹی نے کہا کہ بائیو مائننگ کا جو ٹھیکہ دیا گیا ہے وہ 17 کروڑ روپے کا ہے جبکہ چار تا چھ کروڑ روپے بیت المال کے نقصان ہورہا ہے جس کے لیے برسر اقتدار انتظامیہ ذمہ دار ہے اور اس میں دونوں کی ساز باز ہے۔