مالیگاؤں میونسپل کارپوریشن میں آئی اے ایس کمشنر تقرری کا امکان

مالیگاؤں میونسپل کارپوریشن کی موجودہ صورتحال کے پیش نظر آئی اے ایس کمشنر تقرری کی خبریں ہیں۔ موجودہ کارپوریشن کمشنر کے خلاف عدم اعتماد کی تجویز ایوان میں منظور کی گئی ہے۔

شہر مالیگاؤں میں دس روز قبل تمام سیاسی جماعتوں کی جانب سے خصوصی جنرل بورڈ میٹنگ میں میونسپل کمشنر دیپک کاسار کے خلاف عدم اعتماد کی تجویز اکثریت سے منظور کی گئی تھی لیکن ابھی تک دیپک کاسار کے تبادلے اور ان کی جگہ نئے کمشنر کی تقرری کا کوئی لیٹر جاری نہیں کیا گیا تھا۔ اب خبریں موصول ہورہی ہیں کہ میونسپل کمشنر کے عہدے کے لیے آئی اے ایس افسر کی تقرری کی سرگرمیاں شروع ہوگئی ہیں۔

فی الحال دھننجے نکم مالیگاؤں میونسپل کارپوریشن کمشنر کے عہدے کا عبوری چارج سنبھالے ہوئے ہیں جبکہ بیشر ذمہ داریاں ڈپٹی کمشنر نتن کاپڑنیس انجام دے رہے ہیں۔

مالیگاؤں کے عوام کو امید ہے کہ آئی اے ایس افسر آنے سے ایک جانب جہاں بدعنوانی پر روک لگے گی وہیں، شہری مسائل اور ترقی کے لیے امیدیں روشن ہوں گی۔