Aurangabad Name Change Case اورنگ آباد و عثمان آباد تبدیلی نام کو لے کر بھوک ہڑتال ختم، 12 اکتوبر کو ہائی کورٹ میں اگلی سماعت

اورنگ آباد و عثمان آباد تبدیلی نام کی مخالفت میں آزاد سوابھیمانی سینا کی جانب سے اورنگ آباد ڈویژنل کمشنر آفس کے روبرو 2 اکتوبر سے غیرمعینہ مدت بھوک ہڑتال شروع کی گئی تھی۔ بھوک ہڑتال کو پانچ دن مکمل ہو چکے ہیں۔ احتجاجیوں سے تحصیلدار نے ملاقات کی اور گذارش کی ہے کہ تبدیلی نام معاملہ عدالت میں زیر سماعت ہے، اس میں دو نئی پٹیشن بامبے ہائی کورٹ میں پیش بھی کی گئی ہے، اس لیے ہڑتال ختم کریں۔

اورنگ آباد:ریاست مہاراشٹر کے اورنگ آباد و عثمان آباد تبدیلی نام کی مخالفت میں اورنگ آباد ڈویژنل کمشنر آفس کے روبرو بے مدت آزاد سوا بھیمانی سینا کے صدر سید انظار قادری اور سید عبید انعامدار نے دو اکتوبر سے بھوک ہڑتال شروع کی گئی تھی، لیکن احتجاج کو لے کر ڈویژنل کمشنر آفس کے ذمہ داران نے ریاستی حکومت سے بات کی ، جس پر بتایا گیا کہ اس معاملہ میں حال ہی میں مزید دو PIL داخل کی گئی ہے، جس کی وجہ سے یہاں پر اس معاملہ میں کوئی فیصلہ نہیں کیا جاسکتا، اس لیے بھوک ہڑتال واپس لے۔

ڈویژنل کمشنر آفس کی جانب سے جاری کردہ لیٹر پر احتجاجیوں نے بتایا کہ عدالت میں مقدمہ جب زیر سماعت تھا تو حکومت نے اورنگ آباد ڈویژن، ضلع اور تعلقے کا نام تبدیل کرنے کا فیصلہ کیوں لیا، کیا حکومت کو اس کا حق حاصل ہے، اس ملک میں دو قسم کے قانون چل رہے، عوام کس قانون پر عمل کریں، کہ عدالت کی ہمارے ملک میں کوئی حیثیت باقی نہیں رہی ،حکومت ان تمام سوالات پر صفائی پیش کریں، اس طرح کا مطالبہ احتجاجیوں نے کیا ہے۔ ڈویژنل کمشنر نے احتجاج کرنے والوں سے درخواست کی ہے کہ وہ عدالت میں داخل دو نئی پیٹشنوں پر فیصلہ آنے تک اپنا احتجاج موقوف کریں، جس پر سید انظار قادری اور سید عبید انعامدار نے مشورہ کے بعد تمام قانونی پہلوؤں کو دیکھ کر اپنا احتجاج واپس لے لیا۔

دوسری جانب اورنگ آباد اور عثمان آباد کے نام تبدیلی کو لے کر عدالت میں لڑائی جا رہی ہے۔ بمبے ہائی کورٹ میں حشام عثمانی اور مشتاق احمد کی پی ائی ایل پر بمبے ہائی کورٹ میں لگاتار پچھلے تین دن سے سنوائی چل رہی ہے۔ پٹیشنر مشتاق احمد کی جانب سے ایڈوکیٹ یوسف مچھالہ نے شہر کے تاریخی و سیاحتی پس منظر کے ساتھ ساتھ دستور ہند کی کانسٹی ٹیوشنل مورا لیٹی پر نصف گھنٹہ بحث کی جسے قابل جج صاحبان نے بغور سماعت کیا۔ دو گھنٹے تک مذکورہ معاملہ پر ہیرنگ ہوئی۔ پٹیشنر مشتاق احمد کی جانب سے سینئر ماہر قانون ایڈوکیٹ یوسف مچھالہ نے دستور ہند کی جانب سے دی گئی سیکولر ازم ایکولیٹی کی بات کی اور اس پر بحث ہوئی انہوں نے شہر کا نام اور نگ آباد کب اور کیوں رکھا گیا؟ اس پر بھی مفصل تجزیہ عدالت میں پیش کیا۔

دوسری درخواست گزار محمد هشام عثمانی نے کہا کہ اورنگ آباد شہر کا نام تبدیل کرنے پر درخواست گزار مشتاق احمد کے وکیل نے دلیل دی کہ مرکزی حکومت کی ہدایات اور شہر کی تاریخی شناخت کے مطابق شہر کا نام تبدیل نہیں کیا جا سکتا۔ درخواست گزار مشتاق احمد کے وکیل ایڈووکیٹ یوسف مچھالہ نے بھی کافی دیر تک اپنی طرف سے دلائل دیئے ۔ حکومت کی طرف سے ایڈوکیٹ جنرل وریندر صراف موجود تھے۔