حجامہ کے مختلف فوائد پر تفصیلی رپورٹ

حجامہ ایک قدیم علاج ہے اور محمد صلی اللہ علیہ کی سنت بھی ہے، اس قدیم طریقہ علاج میں جسم کے مختلف حصوں سے فاسد خون کو نکال کر متعدد بیماریوں کا علاج کیا جاتا ہے۔ لفظ حجامہ عربی زبان کے لفظ حجم سے ماخوذ ہے جس کے معنی کھینچنا یا چوسنا ہے اس عمل میں جسم کے الگ الگ حصوں سے تھوڑا سا خون نکالا جاتا ہے۔

ریاست مہاراشٹر کے شہر مالیگاوں سے تعلق رکھنے والے حجامہ اسپیشلسٹ ڈاکٹر فروغ عابد نے اس تعلق سے بتایا کہ حجامہ چاند کی تین تاریخ یعنی کہ 17، 19 اور 21 کو کرانا افضل ہے اور اس میں کئی فوائد پوشیدہ ہیں۔

انھوں نے بتایا کہ مریض کو پہلے ضرورت کے مطابق کپ لگائے جاتے ہیں اور اس کے بعد ان مقامات پر کٹ لگاکر دوبارہ کپ لگادیے جاتے ہیں، جس میں فاسد خون آہستہ آہستہ جمع ہوتا ہے اور اس کے بعد کپ نکال کر مریض کے ان مقامات کو دوائیوں سے صاف کردیا جاتا ہے۔

انہوں نے بتایا کہ حجامہ سے خون صاف ہوتا ہے اور شریانوں پر اس کے حیران کن مثبت اثرات ہوتے ہیں، اس کے علاوہ زیرکمر میں ہونے والی اکڑن سے بھی راحت ملتی ہے، آنکھوں کی بیماریوں کا بھی اس کے ذریعہ علاج کیا جاتا ہے، فشار خون میں آرام دیتا ہے، اس کے علاوہ زخموں میں یہ کافی فائدہ مند ثابت ہوتا ہے۔

ڈاکٹر فروغ عابد نے بتایا کہ حجامہ کے ذریعہ بلڈ پریشر، ٹینشن، جوڑوں کا درد، کمر درد، مائگرین، قبض، بواسیر، گنجان پن، الرجی سمیت متعدد بیماریوں کا علاج کیا جاتا ہے-: