Govt Bus Service Interrupted مراٹھا ریزرویشن تحریک کی وجہ سے سرکاری بس سروس بند

مراٹھا ریزوریشن کے مطالبہ اب پرتشدد احتجاج میں بدلنے لگا ہے۔ اورنگ آباد ڈیژون میں مراٹھا ریزریشن کو لے کر احتجاج کرنے والے لوگوں نے سرکاری بسوں میں توڑ پھوڑ کی اور اس کی آمدورفت میں رخنہ ڈالنے کی کوشش کی۔بسوں کی آمدورفت متاثر ہونے کے سبب عام لوگوں کو بڑی دشواریوں کا سامنا کرنا پڑ رہا ہے۔

اورنگ آباد:مراٹھا ریزرویشن کے مطالبہ کو لے کر ریاست کے مختلف اضلاع میں تحریک چلائی جا رہی ہے۔مراٹھا ریزرویشن کی مانگ کرنے والے احتجاجی کے ذریعہ مختلف مقامات پر سرکاری بسوں کو جلانے کے واقعات بھی سامنے آئے ہیں۔ اس کی وجہ سے مہاراشٹر اسٹیٹ روڈ ٹرانسپورٹیشن نے اورنگ آباد بس ڈپو سے دوسرے اضلاع جانے والی سبھی بسوں کو مکمل طور پر بند کر دیا ہے۔

اس کی وجہ سے مسافروں کو شدید پریشانی کا سامنا ہے۔ اورنگ آباد بس ڈپو پر موجود مسافروں کا کہنا ہے کہ وہ گزشتہ کئی گھنٹوں سے بس سٹینڈ پر بیٹھے ہیں، لیکن بس سروس شروع نہیں ہو رہی ہے۔مہاراشٹر اسٹیٹ روڈ ٹرانسپورٹیشن کارپوریشن کے اورنگ آباد ڈویژن کے کنٹرولر سچن بھاسکر نے ای ٹی وی بھارت کو فون پر بتایا کہ مراٹھا ریزرویشن کو لے کر احتجاج کر رہے لوگوں نے کئی بسوں کو آگ لگائی ہے۔ اس کی وجہ سے انہوں نے بس سروس بند کر دی ہے۔ واضح ہے کہ اورنگ آباد ڈویژن میں تقریباً 1500 گاڑیاں آتی جاتی ہیں اور اورنگ آباد ڈویژن میں روزانہ تقریباً 50 لاکھ روپے کی کمائی ہوتی ہے۔ لیکن بس بند ہونے کی وجہ سے محکمہ ایس ٹی کو بھاری نقصان ہو رہا ہے۔

گنیش رام لال جو جالنا ضلع کے بھوکردن سے اپنے گھر سے شرڈی کے لیے نکلے تھے۔ لیکن بس بند ہونے کی وجہ سے وہ اورنگ آباد بس ڈپو میں پھنس کر رہ گئے ہیں۔ ان کا کہنا ہے کہ انہیں شرڈی اسپتال جانا پڑتا ہے، کیونکہ اب ان کی دوائیں ختم ہوچکی ہیں، اگر انہیں پرائیویٹ گاڑی سے شرڈی جانا پڑتا ہے تو انہیں کافی رقم ادا کرنی پڑتی ہے۔

گوا سے آنے والی الکا بھانوداس اور ان کی خاتون رشتہ دار کا کہنا ہے کہ انہیں گوا سے پونے اور پونے سے دیولگاؤں جانا تھا، لیکن اب اورنگ آباد میں بس سروس بند ہونے کی وجہ سے انہیں اورنگ آباد میں گھنٹوں انتظار کرنا پڑ رہا ہے۔ خاتون ہونے کی وجہ سے وہ کچھ نہیں کر سکتی۔