مہاراشٹر کے سابق وزیراعلی نارائن رانے بی جے پی میں شامل

نارائن رانے سنہ 1999 میں بی جے پی-شیوسینا سے مہاراشٹر کے وزیراعلی تھے لیکن اددھو ٹھاکرے کے خلاف بغاوت کرنے کے سبب انھیں پارٹی سے نکال دیا گیا تھا۔

مہاراشٹر کے قدآور رہنما اور ریاست کے سابق وزیر اعلی نارائن رانے گزشتہ روز ریاست کے موجودہ وزیراعلی دیویندر فڑنویس کی موجودگی میں بی جے پی میں شامل ہوگئے اور اپنی پارٹی 'مہاراشٹر سوابھیمان پکش' کو بھی حزب اقتدار پارٹی میں ضم کردیا۔

ضلع سندھو درگ کے شہر کنکولی مین منعقد ایک تقریب میں نارائن رانے کے بڑے بیٹے اور سابق رکن اسمبلی نلیش کے ساتھ ان کے سیکڑوں کارکنان بھی بی جے پی میں شامل ہوگئے۔

اس موقع پر نارائن رانے نے کہا ہے کہ' وہ فڑنویس کے کام کرنے کے طریقے سے کافی متاثر ہیں اور وہ تیز رفتار ترقی کو یقینی بنانے کے لیے بی جے پی میں شامل ہوئے ہیں'۔

وزیراعلی دیویندر فڑنویس نے بھی اس موقع پر کہا کہ' وہ پہلے سے پی بی جے پی کے رکن ہیں، رانے بی جے پی کی مدد سے ہی راجیہ سبھا کے رکن منتخب ہوئے تھے'۔

واضح رہے کہ نارائن رانے سنہ 1999 میں بی جے پی-شیوسینا سے مہاراشٹر کے وزیراعلی تھے لیکن اددھو ٹھاکرے کے خلاف بغاوت کرنے کے سبب انھیں پارٹی سے نکال دیا گیا تھا۔جس کے بعد انھوں نے کانگریس کا دامن تھام لیا۔

وہ کانگریس اور این سی کی مخلوط حکومت میں وزیر بھی رہے لیکن وزیراعلی بننے کی منشا کے سبب وہ پارٹی میں زیادہ وقت تک نہیں ٹک پائے اور سنہ 2017 میں انھوں نے کانگریس کو الوداع کہہ دیا۔

اس کے بعد انھوں نے اپنی خود کی ایک پارٹی مہاراشٹر سوابھیمان پکش بنائی لیکن آج انھوں نے اسے بی جے پی میں ض کردیا۔

کوکن کا ضلع سندھودرگ نارائن رانے کا گڑھ مانا جاتا ہے۔ وہ گزشتہ کئی مہینوں سے بی جے پی میں شامل ہونے کی کوشش میں لگے ہوئے تھے۔