مہاراشٹرمیں ڈیلٹا پلس کا خوف، کورونا پابندیاں سخت کردی گئیں

ریاست میں دھرنے، احتجاج، ریالیز اور بھوک ہڑتالوں پر مکمل پابندی ہوگی، ساتھ ہی تمام مذہبی مقامات بھی بند رہیں گے۔

ریاست مہاراشٹر نے کورونا وائرس کے ڈیلٹا پلس ویریئنٹ اور ریاست میں تیسری لہر کے انتباہ کے پیش نظر پیر سے کووڈ-19 کی پابندیاں سخت کردی ہیں۔ ذرائع نے بتایا کہ آج سے ریاست کے 33 اضلاع میں تین درجہ کی پابندیاں نافذ کی گئی ہیں۔

انہوں نے کہا کہ ان اضلاع میں تمام دکانیں اور خدمات ہفتہ اور اتوار کو مکمل طور پر بند رہیں گی۔ ریاست میں اسکول، کالجز اور کوچنگ کلاسز بند رہیں گی لیکن آن لائن تعلیم کی اجازت ہوگی۔ ذرائع نے کہا کہ ریاست میں دھرنے، احتجاج، ریلیوں اور بھوک ہڑتالوں پر مکمل پابندی ہوگی اور تمام مذہبی مقامات بند رہیں گے۔

واضح رہے کہ مہاراشٹر حکومت نے کورونا کی ممکنہ تیسری لہر کو کافی سنجیدگی سے لیا ہے اور اس سلسلے میں بڑے پیمانے پر اقدامات کیے جارہے ہیں۔ ممبئی کے مضافات میں کووڈ جمبو سینٹرز بھی بنائے جارہے ہیں اور صحت سے متعلقہ دیگر اقدامات کیے جارہے ہیں۔