ممبئی میں نوکریوں کا جھانسہ دینے والے سائبر گروہ کا پردہ فاش

گینگ کے لوگ زیادہ تر انٹرنیٹ پر ہی سرگرم رہتے ہیں لیکن ممبئی سائبر سیل نے انہیں گرفتار کر لیا

ملازمت کا جھانسہ دیکر تعلیم یافتہ اور روزگار کے متلاشی نوجوانوں کو لوٹنے والی ایک گینگ کے ١٠ ملزمین کو ممبئی کی سائبر سیل شاخ نے گرفتار کیا ہے۔اس گینگ میں٨ لڑکیاں بھی شامل ہیں ۔
پولیس نے انکے پاس سے ٢٢ موبائل فون، ہارڈ ڈسک اور کئی دیگر الیکٹرانک ساز و سامان برآمد کیا جو نوکری کا جھانسہ دینے کے لئے استعمال کیا جاتاتھا۔

سائبر سیل کے ذمہ داروں نے بتایا کہ یہ لوگ ملازمت کے لئےامیدواروں سے فی کس 3400روپےوصول کرتے تھے اور کسی بھی نام چین کمپنی کا آفر لیٹر دینے کے نام پر 18000روپے لیتے تھے لیکن رقم وصولنے کے بعد انکا کوئی اتہ پتہ دستیاب نہیں ہوتا تھا۔
گینگ میں شامل ملزمین متواتر اپنی جگہیں بدل دیا کرتے تھے تاکہ انکا شکار بنے نوجوان انہیں کہیں تلاش نہ کر سکیں ۔
دوران تفتیش ملزموں نے کہا کہ وہ نوجوانوں کو فون کرکے انکے بارے میں تفصیلات جانتے تھے اور بعد میں انکی تعلیمی لیاقت کے مطابق انھیں ملازمت دینے کی بات کرتے تھے۔ رقومات وصول کرنے کے بعد وہ ان نوجوانوں کے نام فرضی آفر لیٹر بھی ارسال کرتے تھے۔