سنجے راوت کو ممتا بنرجی کی جیت کا یقین

شیوسینا کے رہنما سنجے راوت نے کہا کہ 4 ریاستوں میں ہو رہے انتخابات کے نتائج قومی سیاست کی سمت کا تعین کریں گے۔

سنجے راوت نے صحافیوں سے بات کرتے ہوئے کہا کہ آسام میں بی جے پی برسراقتدار ہے لیکن کانگریس نے بہتر مظاہرہ کیا ہے۔ وہیں مغربی بنگال میں بی جے پی کی جانب سے ممتا بنرجی کو شکست دینے کی پوری کوشش کی جارہی ہے لیکن ترنمول کانگریس کی سربراہ بے خوف و خطر مقابلہ کر رہی ہیں اور وہ انتخابات میں کامیابی حاصل کریں گی۔ انہوں نے نندی گرام سے ممتا بنرجی کی جیت کو بھی یقینی بتایا۔

انہوں نے کہا کہ انتخابی نتائج کے بعد ملک میں اپوزیشن جماعتوں کا نیا اتحاد قائم ہوگا۔ راوت نے طنز کرتے ہوئے کہا کہ گذشتہ سال وزیراعظم نے لاک ڈاؤن کا اعلان کرتے وقت کہا تھا کہ صرف 18 دنوں میں کورونا ختم ہوجائے گا۔ انہوں نے کہا کہ ٹی وی پر مہابھارت سیریل کے تمام ایپیسوڈ ختم ہوگئے لیکن ابھی تک کورونا ختم نہیں ہوا۔