الیکشن کمیشن سادھوی پرگیہ کی امیدواری پر فیصلہ کرے

مالیگاؤں بم دھماکے کی کلیدی ملزمہ سادھوی پرگیہ سنگھ ٹھاکر کی امیدواری کو رد کرنے کی عرضی این آئی اے کورٹ میں متاثرین نے دائر کی تھی جسے یہ کہہ کر کورٹ نے مسترد کردیا کہ یہ معاملہ اس کے دائرہ اختیار میں نہیں ہے اس کے لیے عرضی گزار الیکشن کمیشن سے رابطہ کرے۔

اس معاملے میں کورٹ نے الیکشن کمیشن کو فیصلہ کرنے کی ہدایت دی ہے۔

سادھوی پرگیہ سنگھ ٹھاکر بی جے پی کے ٹکٹ پر بھوپال پارلیمانی حلقے سے انتخابات لڑ رہی ہیں۔

مالیگاؤں بم دھماکے کے ہلاک شدہ ایک نوجوان کے اہل خانہ نے سادھوی کی امیدواری کے خلاف عدالت میں عرضی دائر کر کے انہیں انتخابات لڑنے کی اجازت نہیں دینے کے ساتھ ہی ان کی ضمانت بھی منسوخ کرنے کا مطالبہ کیا۔

این آئی اے کورٹ کے جج نے کہا کہ ' کسی کو انتخابات لڑنے سے روکنا کورٹ کے اختیار میں نہیں ہے لہذا اس معاملے پر الیکشن کمیشن فیصلہ کرے۔'

سادھوی پرگیہ سنگھ کون ہے؟

ریاست مہاراشٹر کے مالیگاؤں شہر میں 2008 میں ایک مسجد کے باہر دھماکہ ہوا تھا۔ اس دھماکے میں 6 افراد ہلاک اور متعدد زخمی ہوئے تھے۔ اے ٹی ایس کے چیف آنجہانی ہیمنت کرکرے کی سربراہی میں اس معاملے کی تحقیقات کا آغاز کیا گیا۔ دوران تحقیقات یہ انکشاف ہوا کہ بم دھماکے کے لیے جو موٹر سائیکل استعمال کی گئی تھی، وہ سادھوی پرگیہ سنگھ ٹھاکر کی تھی اور اس نے کم ہلاکت ہونے پر افسوس کا اظہار کیا تھا۔ سادھوی کو 2017 میں مشروط ضمانت پر رہا کیا گیا ہے اور وہ اس معاملے میں ہنوز ملزمہ ہیں۔