NCP Political Crisis این سی پی کے نام اور نشان پر الیکشن کمیشن کا نوٹس، دونوں گروپوں سے جواب طلب

این سی پی سربراہ شرد پوار کے بھتیجے اور مہاراشٹر کے نائب وزیر اعلیٰ اجیت پوار کے کئی ایم ایل اے کے ساتھ بغاوت کرنے کے بعد این ڈی اے میں شامل ہو گئے۔ انہوں نے پارٹی کے نام اور نشان پر بھی دعویٰ کیا ہے۔ دریں اثنا الیکشن کمیشن نے نام اور نشان سے متعلق معاملے پر نوٹس جاری کر کے پارٹی کے دونوں گروپوں سے تین ہفتے کے اندر جواب داخل کرنے کا حکم دیا ہے۔ECI Issues Notice on NCP Name Symbol Dispute

نئی دہلی: الیکشن کمیشن نے بدھ کو نیشنلسٹ کانگریس پارٹی (این سی پی) کے دونوں حریف گروپوں کو پارٹی کے نام اور سرکاری نشان سے متعلق نوٹس کا جواب دینے کے لیے تین ہفتے کا وقت دیا ہے۔ این سی پی ایک گروپ کی قیادت شرد پوار کر رہے ہیں اور دوسرے کی قیادت ان کے بھتیجے اجیت پوار کر رہے ہیں۔ دونوں نے پارٹی کے نام اور انتخابی نشان کے دعوے پر الیکشن کمیشن کے نوٹس کا جواب دینے کے لیے چار ہفتے کا وقت مانگا تھا۔

27 جولائی کو کمیشن نے دونوں حریف گروپوں کو نوٹس جاری کیا۔ کمیشن نے نوٹس میں کہا ہے کہ وہ اصل فریق ہونے کا دعویٰ کرتے ہوئے کمیشن کو جمع کرائے گئے دستاویزات کا تبادلہ کریں۔ 5 جولائی کو، الیکشن کمیشن کو 40 ایم پیز، ایم ایل ایز اور قانون ساز کونسل کے ارکان کے حلف نامہ موصول ہوئے۔ ساتھ ہی باغی گروپ کے ارکان کی طرف سے یہ تجویز بھی ملی کہ انہوں نے اجیت پوار کو این سی پی کے سربراہ کے طور پر منتخب کیا ہے۔ اس حوالے سے خط 30 جون کو لکھا گیا تھا۔ اس سے دو دن پہلے، اجیت پوار نے این سی پی میں بغاوت کی تھی اور آٹھ وزراء کے ساتھ مہاراشٹر کے نائب وزیر اعلی کے طور پر حلف لیا تھا۔

شرد پوار کا بیان

شرد پوار کے زیر قیادت گروپ نے باغی گروپ کے دعوؤں کا نوٹس لینے تک کمیشن کے رجوع نہ کرنے کا فیصلہ کیا تھا۔ الیکشن کمیشن کی نوٹس پر شرد پوار نے رد عمل دیتے ہوئے کہا کہ ملک کا اقتدار بھارتیہ جنتا پارٹی اور اس کے اتحادیوں کے پاس ہے۔ ان سب کا کام معاشرے میں اتحاد قائم رکھنا ہے لیکن یہ لوگ ایک دوسرے کو آپس میں لڑا رہے ہیں۔ اس حکومت نے کئی ریاستوں کی حکومتوں کو گرا دیا ہے جیسے کہ گوا، مدھیہ پردیش اور مہاراشٹر میں۔ ہم سبھی نے دیکھا کہ مہاراشٹر کی ادھو حکومت کو گرانے کے بعد کیا ہوا۔ شرد پوار نے کہا کہ الیکشن کمیشن نے میری پارٹی کو لے کر نوٹس دیا ہے۔ مجھے فکر کرنے کی ضرورت نہیں ہے۔ میں یہ واضح کرنا چاہتا ہوں کہ مرکز کی مودی حکومت کے کچھ لوگوں نے ادھو ٹھاکرے کی شیوسینا پارٹی پر کمیشن کے فیصلے کی مخالفت کی تھی۔ ایسا ہمارے ساتھ بھی ہو سکتا ہے۔