مالیگاؤں: این آر سی سے متعلق مکمل رہنمائی حاصل کیجیے

ریاست مہاراشٹر کے مسلم اکثریتی شہر مالیگاؤں میں عوام این آر سی کے خوف میں مبتلا ہے اور لوگ سرکاری دفاتر،کورٹ اور ایجنٹ سے دستاویزات صحیح کرانے کے لیے چکر کاٹ رہے ہیں۔

آج بروز منگل 17 دسمبر 2019 کو شام پانچ بجے این آر سی فری رہنمائی سینٹر "ایکتا آن لائن سروسیس" کا افتتاح سابق مئیر عبدالمالک یونس عیسی کے ہاتھوں عمل میں آیا۔

ایکتا آن لائن سروسیس کا افتتاح

ایکتا فاونڈیشن کے سکریٹری احتشام شیخ بیکری والا نے بتایا کہ ایکتا فاونڈیشن شہر کے باشعور نوجوانوں کی سماجی تنظیم ہے۔ ایکتا فاونڈیشن کی جانب سے گذشتہ چار ماہ میں مختلف سماجی و فلاحی کام کامیابی کے ساتھ عملی طور پر انجام دیئے گئے ہیں۔

احتشام شیخ بیکری والا نے مزید بتایا کہ ایکتا آن لائن سروسیس شروع کرنے کا مقصد این آر سی سے پریشان غریب عوام کی مکمل رہنمائی کرنا ہے۔ اس سینٹر پر مستحق اور غریب لوگوں کا فری میں آن لائن کام کیا جائے گا۔

انھوں نے یہ بھی کہا کہ آئندہ دنوں میں شہر میں اس طرح کی خدمات انجام دینے کے لیے مزید شاخیں قائم کرکے زمینی سطح پر لوگوں کی مدد کی جائے گی۔