مہاراشٹر: خاتون کے ساتھ جنسی ہراسانی کے الزام میں آٹھ گرفتار

ریاست مہاراشٹر کے ضلع تھانے میں ہفتے کے روز ایک خاتون اور اس کے دو دوستوں کو زدوکوب کرنے کے الزام میں کم از کم آٹھ افراد کو گرفتار کیا گیا ہے.

ریاست مہاراشٹر کے ضلع تھانے میں ایک لڑکی کے ساتھ جنسی ہراسانی کا معاملہ سامنے آیا ہے۔ دراصل تھانے میں پولیس نے مبینہ طور پر ایک خاتون اور اس کے دو مرد دوستوں کو زدوکوب کرنے کے الزام میں آٹھ افراد کو گرفتار کیا ہے۔ یہ واقعہ تھانے ضلع کے کلیان علاقے میں جمعہ اور ہفتہ کی درمیانی شب کا ہے۔

خاتون اپنے دوست کی سالگرہ منانے کے بعد الہاس نگر سے آٹو رکشا میں گھر لوٹ رہی تھی۔ آٹو ڈرائیور نے مبینہ طور پر خاتون کو چھیڑنا شروع کر دیا۔ خوفزدہ ہوکر خاتون نے مدد کے لئے اپنے دو دوستوں کو موقع پر بلایا۔

تاہم یہ الزام لگایا گیا ہے کہ ڈرائیور نے سڑک پر ہی ان تینوں کو پیٹنا شروع کردیا۔ بعد میں متعدد افراد جمع ہوگئے اور آٹو ڈرائیور کے ساتھ مل کر خاتون اور اس کے دوستوں کو پیٹنا شروع کر دیا۔

اس واقعے کی ایک ویڈیو وائرل ہوئی ہے جس میں ہجوم تینوں کو بیلٹ سے پیٹتے ہوئے اور خاتون کو کھینچتے ہوئے نظر آ رہے ہیں۔

اس سلسلے میں مختلف دفعات کے تحت ایف آئی آر بھی درج کی گئی ہے۔

فی الحال پولیس معاملے کی جانچ کر رہی ہے۔