دلیپ کمار کا ناگپاڑہ علاقہ سے خاص تعلق تھا

بالی ووڈ کے عظیم اداکار دلیپ کمار کا 98 برس کی عمر میں انتقال ہوگیا۔ دلیپ کمار کے انتقال پر ملک و بیرون ممالک میں ان کے چاہنے والوں نے گہرے صدمہ اور غم کا اظہار کیا ہے۔

دلیپ کمار کی موت سے ملک میں غم کا ماحول ہے جبکہ سیاسی، سماجی اور شوبز شخصیات کی جانب سے شدید غم کا اظہارکیا جارہا ہے وہیں ادبی حلقوں میں بھی دلیپ کمار کے انتقال پر افسوس کیا جارہا ہے۔

ممبئی شہر سے تعلق رکھنے والے سلیم ناگہانی نے دلیپ کمار کی موت پر گہرے صدمہ کا اظہار کرتے ہوئے انہیں صدی کی عظیم شخصیت قرار دیا۔ انہوں نے کہا کہ دلیپ صاحب سیکولر نظریات کے حامل تھے، جبکہ انہوں نے ہمیشہ اقلیتوں کے حقوق کےلیے آواز بلند کیں۔ سلیم ناگہانی نے کہا کہ دلیپ کمار کے انتقال سے جو خلا پیدا ہوا ہے اس کا بھرنا ممکن نہیں ہے۔

صابو صدیق ٹیکنیکل کالج کے سابق رجسٹرار یاسین شیخ نے بتایا کہ ناگپاڑہ اور یہاں کے لوگوں سے دلیپ کمار کا گہرا تعلق تھا۔ یہاں دلیپ صاحب کے خاص دوست احمد مرچنٹ رہا کرتے تھے۔ دلیپ صاحب سے دوستی کی وجہ سے احمد مرچنٹ کو بھی خاصی مقبولیت حاصل تھی۔ یہی وجہ تھی کہ علاقہ کی ایک سڑک کو ’میاں احمد مرچنٹ‘ کے نام سے منسوب کیا گیا۔