کانگریس صرف پریس ہی نہیں عدلیہ کو بھی نہیں چھوڑتی: بی جے پی

بھارتیہ جنتا پارٹی (بی جے پی) نے معروف ٹی وی صحافی ارنب گوسوامی کے خلاف مہاراشٹر پولیس کی کارروائی کی سخت مذمت کرتے ہوئے آج کہا کہ اس واقعہ میں شیوسینا کے کندھے پر کانگریس کا ہاتھ ہے اور اس نے پریس کے ساتھ ساتھ عدلیہ کو بھی شکاربنایا ہے۔

بی جے پی ترجمان سمبت پاترا نے یہاں ایک پریس کانفرنس میں کہا،’’ارنب گوسوامی جی کے ساتھ آج جو ہوا ہے، یہ صحافتی دنیا کے لیے ایک سیاہ دن ہے۔ان کے بیٹے کے اوپر حملہ کرنا، ان کے گھر سے ان کو گھسیٹ کر لے جانا اور وہ بھی ایک ایسے کیس میں جو 2018 میں بندہوگیا تھا۔اگر آج ہم متحد نہیں ہوں گے تو کل باری ہم سب کی ہے۔

انہوں نے کانگریس صدر سونیا گاندھی کی جانب اشارہ کرتے ہوئے کہا،’’مسولنی کے داہنا ہاتھ رہ چکے باپ کی بیٹی آج جس طرح ہندوستان میں مافیا راج قائم کررہی ہے یہ آپ سب کے سامنے ہے۔’’انہوں نے کہا کہ صرف کسی ایک چینل کے نہیں، بلکہ تمام چینلوں کے حقوق کے لیے آج ہم آوازاٹھارہے ہیں۔ماں بیٹے کی مافیا حکومت نے صرف پریس کے اوپر ہی حملہ نہیں کیا، بلکہ جب ان کے حق میں فیصلہ نہیں آتا تو یہ چیف جسٹس کو بھی نہیں چھوڑتے۔