بڑے جانوروں کی قربانی اور مساجد میں نماز کا مطالبہ

ریاست مہاراشٹر کے صنعتی شہر بھیونڈی میں عیدالاضحی کے موقع پر بڑے جانوروں کی قربانی اور مساجد میں نماز کا مطالبہ کرتے ہوئے کانگریس کے ایک وفد نے مقامی افسران کو وزیر اعلی کے نام ایک مکتوب پیش کیا۔

کانگریس پارٹی کے مقامی صدر شعیب اشفاق خان گڈو کی قیادت میں کانگریسی عہدیداران کے ایک وفد نے میونسپل کمشنر ڈاکٹر پنکج آشیا اور ڈپٹی پولیس کمشنر راجکمار شندے اور پرانت آفیسر کو عیدالاضحٰی کے موقع پر بڑے جانور بھینس کی قربانی کرنے اور اس دن مساجد میں نماز ادا کرنے کی اجازت دیئے جانے کا مطالبہ کیا اور ایک مکتوب وزیر اعلٰی ادھو ٹھاکرے، نگراں وزیر ایکناتھ شندے کو ای میل کیا ہے۔

شعیب اشفاق خان گڈو نے بتایا کہ انہوں نے سب سے پہلے میونسپل کمشنر ڈاکٹر پنکج آشیا سے ملاقات کر کے یکم اگست کو عیدالاضحٰی کے موقع پر بڑے جانور کی قربانی اور مساجد میں نماز اس دن دن شہر میں خصوصی صاف صفائی کو لیکر تبادلہ خیال کیا جس پر کمشنر نے کہاکہ ان کی تمام تیاریاں ہے مگر ریاستی حکومت کی جانب سے جو گائیڈ لائن ہوگی اس کے مطابق وہ اور کارپوریشن کام کریں گے۔

شعیب اشفاق خان نے کہا کہ بڑے جانور بھینس کی قربانی کو لیکر شہر میں تذبذب کی صورتحال ہے اسی کو لیکر انہوں نے شہر کے تمام اعلیٰ افسران سے ملاقات کر کے وزیراعلیٰ اور نگراں وزیر کو بھی قربانی سے متعلق ایک مکتوب ای میل کیا ہے۔

انہوں نے اپنے اس مکتوب میں افسران اور حکومت کو بتایا ہے کہ اسلام میں قربانی ایک اہم فریضہ ہے اور بکرے پر ایک نام اور بڑے جانور پر سات نام کی قربانی ہوتی ہے اور کئی افراد مل کر کم قیمت میں سنت ابراہیمی کے فرائض کو انجام دیتے ہیں۔

انہوں نے کہا کہ شہر کا مسلمان کورونا کے اس دور میں تمام گائیڈ لائن پر عمل کریں گی۔ اس وفد میں اسٹینڈنگ کمیٹی چیرمین حلیم انصاری، شاف مومن ،اشرف منا، عارف خان، مرزا ذاکر موتی والا، سمیت دیگر کارپوریٹر اور عہدیداران موجود تھے۔