'شہری عوام کو احتیاطی تدابیر پر عمل کرنا ہوگا ورنہ سخت کارروائی ہوگی'

ریاست مہاراشٹر کے مسلم اکثریتی شہر مالیگاؤں میں مقامی پولس انتظامیہ کی جانب سے ایک پریس کانفرنس منعقد کی گئی۔ پریس کانفرنس میں ایڈیشنل ایس پی چندر کانت کھنڈوی نے کورونا کو لیکر ایک پریس ریلیز جاری کیں ہیں۔

اس پریس ریلیز کے مطابق بتایا گیا کہ مالیگاوں شہر گزشتہ دنوں کورونا کی زد میں رہا، بعد ازاں شہری عوام نے کارپوریشن اور پولیس انتظامیہ کے ساتھ بہترین تعاون کیا اور مالیگاوں شہر کو کورونا سے مکت کروایا تھا۔ لیکن عوام کو بے فکر رہنے کی ضرورت نہیں ہے۔

کورونا شہر سے مکمل طور سے ختم نہیں ہوا ہے، ہمیں اب بھی احتیاط ضروری ہے۔ لہذا شہری عوام ماسک اور سوشل ڈسٹنسنگ کا خیال رکھتے ہوئے کارپوریشن اور پولیس انتظامیہ کا تعاون کریں۔کیونکہ کورونا کی دوسری لہر کا خدشہ ہے، اسلئے ہمیں احتیاط کرنا ضروری ہے۔

انہوں نے اخباری نمائندوں کو جانکاری دیتے ہوئے کہا کہ مالیگاوں شہر کی عوام ان دنوں لاپرواہی کا مظاہرہ کرتے ہوئے نظر آرہی ہے۔عوامی مقامات پر سوشل ڈسٹنسنگ کا خیال نہیں رکھا جارہا ہے۔ وہیں ماسک کا استعمال بھی نظر نہیں آرہا ہے۔اسلئے شہری عوام کو احتیاطی تدابیر پر عمل کرنا لازمی ہوگا۔ ورنہ انتظامیہ اس معاملے میں سخت کاروائی کے اقدامات کرنے میں تاخیر نہیں کریگی۔