بالی وڈ کی ڈمپل گرل اور معروف اداکارہ دیپیکا پاڈوکون نے اپنی آنے والی فلم 'چھپاک' کی خاطر جب پروستھیٹک (مصنوعی) میک اپ لگوایا تو وہ خود کو دیکھ کرحیران رہ گئیں۔
دیپیکا کی آنے والی فلم 'چھپاک' کا ٹریلر لانچ ہوگیا ہے، اور فلم کے ٹریلر کو زبردست رسپانس مل رہا ہے۔
مداحوں اور شائقین کو ٹریلر میں دیپیکا کی محنت واضح طور پر دکھائی دے رہی ہے، بات چاہے دیپیکا کی اداکاری کی ہو یا فلم میں ان کے میک اپ کی، وہ ہر پہلو میں لاجواب نظر آرہی ہیں۔
فلم چھپاک میں دیپیکا کو تیار کرنے کے لیے مصنوعی میک اپ کااستعمال کیا گیا ہے۔ اس ضمن میں انہوں نے کہا 'جب میں نے مصنوعی میک اپ کے بعد پہلی بار اپنے آپ کو آئینے میں دیکھا تو مجھے محسوس ہوا کہ میں یہ کردار جی رہی ہوں۔ اس دن مجھے یہ معلوم ہوگیا کہ اس کردار کونبھانے کے لیےکیا کیا کرنے کی ضرورت ہے'۔
قابل ذکر بات یہ ہے کہ فلم چھپاک سچے واقعات پر مبنی ہے۔ اس فلم میں دیپیکا ایسڈ سروائیور(تیزاب حملے کی متاثرہ) لکشمی اگروال کا کردار ادا کررہی ہیں۔
خیال رہے کہ فلم چھپاک آئندہ برس 10 جنوری کو ریلیز ہوگی۔
