مہاراشٹر میں بڑی سیاسی کروٹ

گذشتہ کل تک یہ طے کرلیا گیا تھا کہ مہاراشٹر میں شیوسینا کے سربراہ ادھو ٹھاکرے بحیثیت وزیراعلی حلف لیں گے اور نیشنلسٹ کانگریس پارٹی کے سینیئر رہنما اجیت پوار نائب وزیراعلی اور کانگریس سے ایک سینیئر رہنما بھی ریاست کے نائب وزیراعلی بنیں گے لیکن رات گزری اور صبح کے سویرے نے سب کچھ بدل دیا۔

سیاسی مبصرین بھی اس واقعے پر انگشت بدنداں ہیں۔ صبح سب سے پہلے یہی خبر آئی کہ بی جے پی کے سینیئر رہنما دیویندر فڑنویس نے مہاراشٹر میں دوسری بار وزیراعلی کے طور پر حلف لے لیا اور انہوں نے اپنا معاون این سی پی کے سینیئر رہنما اجیت پوار کو بنایا ہے۔

کسی کے یہ وہم گمان میں نہیں تھا کہ اچانک ایسا کوئی واقعہ ہوگا۔ راتوں رات حکومت سازی کا فیصلہ کیسے کرلیا گیا کہ کسی کو کانوں کان خبر تک نہیں ہوئی۔

اس سیاسی تبدیلی کو بہت دنوں تک یاد کیا جائے گا اور مہاراشٹر کی سیاسی تاریخ میں اسے سب سے پہلے رکھا جائے گا۔

گذشتہ کل تک یہ طے مانا جارہا تھا کہ بی جے پی کو این سی پی۔شیوسینا اور کانگریس نے اقتدار سے بے دخل کردیا ہے لیکن صبح کی پہلی کرن نے بی جے پی کی حکومت بننے کا اعلان کیا وہ بھی این سی پی کے ساتھ۔

ملک کی تاریخ میں ایسا کوئی دوسرا واقعہ نہیں ملتا ہے۔ اسے شاذ سیاسی واقعے کے طور پر سیاسی مبصرین دیکھ رہے ہیں۔

مزید کیا کچھ تبدیلیاں رونما ہوں گی ہم اس سے آپ کو مسلسل باخبر کرتے رہیں گے۔