بیاد عبدالسلام اظہر شعری نشست

سی اے اے، این آر سی اور این پی آر کو لیکر ملک گیر احتجاج ہو رہے ہیں۔ ہر طرف آزادی کے نعرے، انقلابی نظموں، گیتوں اور اشعار کا استعمال احتجاجی مظاہروں میں کیا جا رہا ہے۔ اردو ادب کے فیض احمد فیض، علامہ اقبال، نہال جالب و دیگر انقلابی شعراء کے کلام پڑھے جا رہے ہیں۔

ایسے وقت میں ریاست مہاراشٹر کے شہر مالیگاؤں میں انجمن فروغ ادب کے زیر انصرام معروف انقلابی شاعر عبدالسلام اظہر کی یاد میں شعری نشست کا انعقاد کیا گیا۔ شہر کے نوجوان شعراء کی جانب سے تین جنوری 2019 کی شب میں "بیاد عبدالسلام اظہر" شعری نشست مالیگاؤں ہائی اسکول میں منعقد کی گئی۔

اس شعری نشست کی صدارت معروف شاعر سلیم قیصر نے کی اور صدارتی خطبہ میں نوجوان شعراء کو اس کامیاب نشست منعقد کرنے پر مبارکباد پیش کی۔ سلیم قیصر نے کہا کہ شاعر کا دل حساس بھی ہوتا ہے اور وہ حالات و سماج کے پیش نظر جذبات و احساسات کا اظہار کلام کے ذریعے پیش کرتا ہے۔

بیاد عبدالسلام اظہر شعری نشست

مرحوم انقلابی شاعر عبدالسلام اظہر کی ادبی خدمات کا اعتراف "اناالبحر" کتاب کے مصنف اسماعیل وفا نے بطور خراج عقیدت پیش کیا۔ اس شعری نشست کی نطامت ناظم نسل نو عمران راشد نے بخوبی نبھائیں اور نشست کے کنوینر صدیق اکبر نے تمام شعراء کرام کا شکریہ ادا کیا۔

عبدالسلام اظہر کا مشہور شعر:

سلگتی ریت پر تلے لہو لہو کرنا
پھر اس کے بعد گلابوں کی آرزو کرنا

اس نشست میں مجتبی زید، زید حیدر، عین فاروقی، فیضان رضا، حبیب دانش، صدیق اکبر، عمران راشد، ظہیر اکمل، اسماعیل ہر فن مولا، شہروز خاور، اسد ہاشمی و دیگر نوجوان شعراء نے کلام پیش کئے۔

بیاد عبدالسلام اظہر شعری نشست

بعد ازاں ای ٹی وی بھارت کے نمائندے نے مصنف اسماعیل وفا سے عبدالسلام اظہر کے بارے میں جاننے کی کوشش کی۔ اسی طرح سے نشست میں شہریت ترمیمی قانون کے خلاف احتجاج کر رہی جامعہ کی طالبات کی نظر انقلابی نظم پیش کرنے والے شاعر ڈاکٹر شہروز خاور سے بھی بات چیت کی۔