مالیگاؤں: بی ایس پی کی مقامی یونٹ نے مولانا اسحاق نقشبندی کی درگاہ پر عقیدت کی چادر پیش کی

مالیگاؤں شہر میں بہوجن سماج پارٹی کی مقامی یونٹ کی جانب سے مولانا اسحاق نقشبندی رحمتہ اللہ علیہ کی درگاہ پر عقیدت کی چادر پیش کی گئی۔

ریاست مہاراشٹر کے مسلم اکثریتی شہر مالیگاؤں میں بہوجن سماج پارٹی کی مقامی یونٹ کی جانب سے مولانا اسحاق نقشبندی رحمتہ اللہ علیہ کی درگاہ پر عقیدت کی چادر پیش کی گئی۔ اس موقع پر مالیگاؤں سینٹرل حلقہ نمبر 114 کے صدر ظہور بھائی زم زم نے بتایا کہ بی ایس پی کارکنان نے مولانا اسحاق نقشبندی رحمتہ اللہ علیہ کی درگاہ پر چادر پیش کی اور وہ یہاں یہ مراد لے کر آئے تھے کہ آئندہ چند ماہ بعد ہونے والے شہر کے میونسپل کارپوریشن کے انتخابات میں انہیں 50 تا 55 سیٹیں حاصل ہوں۔

ظہور زم زم نے بتایا کہ مالیگاؤں میونسپل کارپوریشن کے انتخابات میں ان کی پارٹی شاندار فتح حاصل کرے گی اور ساتھ ہی میئر بنانے میں بھی وہ اہم کردار ادا کریں گے۔

واضح رہے کہ مالیگاؤں شہر میں آئیندہ برس کے آغاز میں ہی میونسپل کارپوریشن کے انتخابات ہونے والے ہیں جس کے لیے سبھی پارٹیاں ابھی سے ہی انتخابات لڑنے کی تیاریوں میں مصروف ہوگئی ہیں۔