اورنگ آباد: ریاست مہاراشٹر کے اورنگ آباد شہر کی سانچی نامی لڑکی کو انگلینڈ کے لڑکے سے پیار ہوگیا۔ جس کے بعد برطانوی لڑکے نے اپنے پورے خاندان کے ساتھ اورنگ آباد پہنچ کر بدھ مذہب کے رسم و رواج کے مطابق سانچی سے شادی کی جس کا ویڈیو سوشل میڈیا پر وائرل ہو رہا ہے۔ انگلینڈ سے آئے باراتی بھارتی لباس پہن کر بھارتی گانوں پر رقص کرتے ہوئے نظر آئے۔ دولہا ایڈورڈ جو اپنے خاندان کا اکلوتا بیٹا ہے کو اورنگ آباد کی سانچی نامی لڑکی سے پیار ہوگیا، دونوں کی مُلاقات 2019 میں انگلینڈ میں ہوئی تھی تبھی سے دونوں ایک دوسرے سے پیار کرنے لگے 3 سال کے بعد دونوں نے شادی کے لیے گھر میں بات چیت کی جس کے بعد دونوں کے گھر والے شادی کے لیے راضی ہو گئے۔
لیکن خبر کے مطابق لڑکی کی طرف سے شرط رکھی گئی کہ شادی بھارت کے اورنگ آباد میں ہونگی اور وہ بھی بھارتی بدھ رسم و رواج کے ساتھ۔ جس کے بعد دولہے کے گھر والے شادی کے لیے راضی ہوگئے اور دونوں کی شادی اورنگ آباد کے ایک پانچ ستارہ ہوٹل میں ہوئی۔ ایڈورڈ کے والد کا کہنا ہے کہ انہیں بھارتی بہو ملی ہے اس لیے وہ بہت خوش ہیں، بھارت میں شادی میں تین سے چار دن لگتے ہیں لیکن برطانیہ میں شادی ایک گھنٹے میں ہو جاتی ہے۔ ایڈورڈ کے رشتہ داروں کا کہنا ہے کہ بھارت میں شادی بڑے ہی دھوم دھام سے کی جاتی ہے۔ یہاں کی شادی میں مختلف رسمیں ہوتی ہیں۔ جِس میں ہلدی، مہندی شامل ہے۔