ممبئی: مہاراشٹر کے سابق وزیر داخلہ انل دیشمکھ ضمانت مل گئی ہے ۔ حالانکہ ضمانت صرف ای ڈی معاملے میں ملی ہے۔ سی بی آئی نے بھی ان کے خلاف مقدمہ درج کر رکھا ہے، اسی لیے وہ فی الحال جیل میں ہی رہیں گے۔ Anil Deshmukh Granted Bail
اس سے قبل جسٹس این جے جمعدار نے تمام فریقین کے دلائل سننے کے بعد گزشتہ ہفتے اس معاملے پر فیصلہ محفوظ کر لیا تھا۔ قبل ازیں سپریم کورٹ نے ہائی کورٹ کو ہدایت دی تھی کہ وہ نیشنلسٹ کانگریس پارٹی (این سی پی) رہنما کی عرضی پر تیزی سے سماعت کرے اور اپنا فیصلہ دے کیونکہ یہ معاملہ چھ ماہ سے زیر التوا ہے۔
ای ڈی کی طرف سے پیش ہوئے ایڈیشنل سالیسٹر جنرل (اے ایس جی) انل سنگھ نے ضمانت کی درخواست کی مخالفت کرتے ہوئے کہا تھا کہ دیشمکھ کو کوئی ایسی بیماری نہیں ہے جس کا علاج جیل کے ہسپتال میں نہ ہوسکے۔ دیشمکھ کو ای ڈی نے نومبر 2021 میں گرفتار کیا تھا اور وہ فی الحال عدالتی حراست میں ہیں۔ ممبئی پولیس کے سابق کمشنر پرم بیر سنگھ کے لگائے گئے الزامات کے بعد سنٹرل بیورو آف انویسٹی گیشن (سی بی آئی) نے ان کے خلاف بدعنوانی کا مقدمہ درج کیا اور پھر ای ڈی نے بھی ان کے خلاف مقدمہ درج کیا تھا۔ Anil Deshmukh Granted Bail
ای ڈی نے دعویٰ کیا ہے کہ دیشمکھ نے اپنے سرکاری عہدے کا غلط استعمال کیا اور ممبئی کے مختلف 'بارز' اور ریستوران سے 4.7 کروڑ روپے کی خورد برد کی۔ ایجنسی نے الزام لگایا کہ غلط طریقے سے کمائی گئی رقم دیشمکھ نے ناگپور کے تعلیمی ٹرسٹ 'شری سائی تعلیم سنستھان' کو بھیجی تھی جس کا کنٹرول ان کے خاندان کے پاس ہے۔
