مغربی بنگال میں بی جے پی کی شکست سیکولرزم کی فتح

سماجوادی پارٹی کے رکن اسمبلی اور مہاراشٹر یونٹ کے صدر ابو عاصم اعظمی نے کہا کہ مغربی بنگال میں بی جے پی کی شکست دراصل سیکولرزم کی جیت ہے۔ مغربی بنگال میں ٹی ایم سی واضح اکثریت حاصل کر کے مسلسل تیسری بار حکومت بنانے جا رہی ہے۔

سماجوادی پارٹی رہنما ابو عاصم اعظمی نے کہا کہ کورونا وبا کے دوران مرکزی حکومت کی ناکامی سے پریشان عوام نے مغربی بنگال میں اسے سبق سکھا دیا ہے۔

ابو عاصم نے کہا کہ بی جے پی ہمیشہ سے نفرت کی سیاست کرتی آئی ہے اور ہمیشہ اس نے ہندو اور مسلمانوں کے درمیان تفرقہ پیدا کیا ہے اس لیے مغربی بنگال کے عوام نے اسے خارج کر دیا۔

انہوں نے کہا کہ مغربی بنگال میں بی جے پی کی شکست سیکولرزم کی جیت کے مترادف ہے کیونکہ عوام نے مذہب، ذات پات اور فرقہ پرستی سے اوپر اٹھ کر ووٹ دیا ہے اور یہ نتائج بی جے پی کی ہندو مسلم انتشار اور نفرت انگیزی کے منہ پر زناٹے دار طمانچہ ہے۔