بھیونڈی: جنتا کرفیو کے دوران اجتماعی اذان کا اہتمام

مہاراشٹر کے صنعتی شہر بھیونڈی جنتا کرفیو کے دوران شام چار بجے اجتماعی اذان کا اہتمام کیا گیا اور شہر کے متعدد علاقوں میں شہری اذان دیتے ہوئے نظر آئے۔

کورونا وائرس سے نمٹنے کے لیے وزیراعظم نے اتوار کو جنتا کرفیو کا اہتمام کرنے کی اپیل کی تھی جس کے بعد آج پورا دن سڑکوں پر سناٹا چھایا ہوا ہے جبکہ مودی نے اپیل کی تھی کہ اس جنتا کرفیو کے دوران شام میں 5 بجے ہر شخص اپنے گھر کے باہر، بالکی یا چھت پر تھالی، تالی یا کسی بھی قسم کی بیل (گھنٹی) بجا کر ان تمام افراد کی حوصلہ افزائی کریں جو اس سنگین صورتحال میں بھی کورونا وائرس سے متاثر افراد کے علاج میں مصروف ہیں۔

اس اعلان کے بعد پورے ملک میں ہر جگہ عوام نے تھالی اور تالی بجا کر میڈیکل اسٹاف کی حوصلہ افزائی کی جبکہ بھیونڈی رضا اکیڈمی نے ایک منفرد کام کیا اور اجتماعی اذان اور دعا کرنے کا اعلان کیا۔

واضح رہے کہ کورونا وائرس کے پیش نظر تقریباً ہر ریاست میں 31 مارچ تک مکمل لاک ڈاؤن کا اعلان کیا گیا ہے تا کہ اس جان لیوا وائرس کو مزید پھیلنے سے روکا جا سکے۔