گزشتہ روز جاری ہونے والے بی جے پی کے انتخابی منشور میں ویر ساورکر کو بھارت رتن دیئے جانے کا وعدہ کیا گیا ہے اس وعدے کو لیکر ریاست کی سیاست گرم ہوگئی ہے۔
سماجوادی پارٹی کے ریاستی صدر ابوعاصم اعظمی، ویڈیو سماجوادی پارٹی کے ریاستی صدر ابوعاصم اعظمی نے مہاراشٹر کے صنعتی شہر بھیونڈی میں میڈیا سے گفتگو کرتے ہوئے کہا کہ بی جے پی ایک فرقہ پرست پارٹی ہے اور وہ ہمیشہ صرف ہندو مسلم، بھارت پاکستان، لوجہاد، تبدیلی مذہب اور گائے پر سیاست کرتی ہے جبکہ ملک میں انسان بھوکا مر رہا لیکن بی جے پی اس تعلق سے نات نہیں کرتی۔
بی جے پی کے انتخابی منشور میں ویر ساورکر کو بھارت رتن دئے جانے کا وعدہ کے سوال پر ابوعاصم اعظمی نے کہا کہ اس شخص کو بھارت رتن نہیں دیا جانا چاہیے جس نے جیل میں انگریزی حکومت کے سامنے گھٹنے ٹیک کر معافی مانگی ہو، جسے 50 برس کی سزا ہوئی ہو اور معافی مانگنے پر 10 برس میں رہا کردیا گیا ہو، جس نے انگریزوں کو خط لکھ کر کہا ہو کہ مجھے ایک بار معاف کردو میں گاندھی کے سو دیشی کے آندولن کو ختم کردوں گا۔
انہوں نے کہاکہ اگر بھارت رتن کے لیے کسی کا نام سب سے آگے ہونا چاہیے تو بھگت سنگھ کا نام ہونا چاہیے کیوں کہ انہوں برطانوی حکومت سے کہا کہ ہم تمہاری حکومت کے خلاف ہیں، اگر ہمیں پھانسی دینا ہے تو دے دو کوئی فرق نہیں پڑتا ہے۔
ابو عاصم اعظمی نے اپیل کی کہ بھگت سنگھ کو بھارت رتن دلانے کے لیے پورے ملک کو آگے آنا چاہیے۔
