گوونڈی میں ایس ایم ایس کمپنی فورا بند کی جائے: ابوعاصم اعظمی -

ممبئی کے مضافات کے گوونڈی نامی علاقے میں جاری ناکارہ اور فاضل مادوں کوتبا ہ کرنے والی ایس ایم ایس کمپنی کو فوری طور پر بند کیا جائے یہ مطالبہ سماجوادی پارٹی لیڈر و رکن اسمبلی ابوعاصم اعظمی نے ایوان اسمبلی میں کیا ہے۔

انہوں نے بتایا کہ وہ گزشتہ 10 برس سے مانخورد شیواجی نگر میں قائم اس ایس ایم ایس کمپنی کو بند کرنے کا مطالبہ کررہے ہیں لیکن اب تک اسے بند نہیں کیا گیا ہے۔

اعظمی نے بتایا کہ بار بار ایوان میں صرف یقین دہانی کروائی جاتی ہے کہ ایس ایم ایس کمپنی کو فورا بند کر دیا جائیگا لیکن دو دن بعد واپس کمپنی کی جانب سے طبی اعضاء اور میڈیکل کے فضلاء جلانے کا کام شروع ہوجاتا ہے۔ انسانی اعضاء اور د یگر زہریلے کیمیکل جلائے جاتے ہیں اس سے دھواں پیدا ہوتا ہے۔ یہ دھواں انسانی صحت کیلئے مضر ہوتا ہے۔ اس سے گوونڈی کے عوام کی زندگی اجیرن بن گئی ہے۔

اعظمی نے ناراضگی کا اظہار کرتے ہوئے کہا کہ گوونڈی میں 10 برسوں کے مطالبہ کے باوجود بجلی کا سب اسٹیشن تیار نہیں کیا گیا ہے یہ کافی افسوس کی بات ہے۔

اعظمی نے کہا کہ لوگوں کا آلودگی سے برا حال ہے۔ یہاں کے عوام کو بجلی جیسی بنیادی سہولیات تک میسر نہیں ہے ایسے میں اعظمی نے گوونڈی میں ایس ایم ایس کمپنی کو فورا بند کئے جانے اور وہاں بجلی کا سب اسٹیشن تیار کر نے مطالبہ متعلقہ وزیر سے کیا ہے۔