اورنگ آباد: 'اسٹاپ ہیٹ' مہم کے ذریعے لوگوں میں بیداری لانے کی کوشش

سوشل میڈیا پر نفرت انگیز پیغامات کے خلاف مہاراشٹر کے شہر اورنگ آباد اور اطراف کے اضلاع میں نفرت کے خلاف ایک مہم شروع کی گئی ہے جس کا مقصد آپسی محبت اور بھائی چارے کو عام کرنا ہے۔ اس مہم کا نام 'اسٹاپ ہیٹ' ہے۔

مذہبی منافرت کے نتیجے میں عام انسان تنہا گھر سے نکلنے میں خوف محسوس کر رہا ہے کہ کب کوئی ہجوم اس پر حملہ کردے اس کی سب سے خراب مثال ماب لنچنگ ہے۔ اسی نفرت کے خلاف اورنگ آباد کے کچھ نوجوانوں نے یہ مہم شروع کی ہے۔

اس مہم کے ذریعے عوامی مقامات، پارک، سیاحتی مقامات اور گلی چوراہوں میں لوگوں کو انسانی قدر اور اور گنگا جمنی تہذیب کے تعلق سے معلومات دی جارہی ہے۔

اس مہم سے وابستہ لوگوں کا کہنا ہے کہ پچھلے دو مہینوں میں انہیں کافی کچھ کامیابی ملی ہے اور نوجوان طبقہ ذات مذہب سے اوپر اٹھ کر اس مہم سے جڑ رہا ہے۔

نوجوانوں میں بیداری پیدا کرنا 'اسٹاپ ہیٹ مہم' کا بنیادی مقصد ہے۔ اسی مقصد کے تحت زیادہ سے زیادہ نوجوانوں کو جوڑا جارہا ہے۔

اس مہم سے وابستہ لوگوں کا کہنا ہے کہ اس مہم میں پولیس اور سائبر کرائم کا بھی انہیں تعاون مل رہا ہے لیکن زمینی سطح پر مزید بیداری ضروری ہے۔ یہ گروپ نفرت پھیلانے والوں کو عدالت میں لانے کی بھی تیاری کر رہا ہے۔

اس گروپ کا دائرہ نہ کار مراٹھواڑہ ریجن ہی ہے لیکن ان کا کہنا ہے کہ ملک میں کہیں بھی کوئی بھی ناخوشگوار واقعہ رونما ہوتا ہے تو اس کے اثرات پورے ملک پر ہوتے ہیں اسی لیے ضروری ہے کہ محبت کے پیغام کو عام کیا جائے۔