جب مریضہ کو ڈاکٹر الطاف میں روی نظر آیا

ریاست مہاراشٹر کے شہر اورنگ آباد کے ایک ہسپتال میں مریضہ اور ڈاکٹر کا رشتہ اس وقت ماں بیٹے کا رشتہ بن گیا جب مریضہ کو ڈاکٹر میں اپنے شہید بیٹے کی جھلک نظر آئی۔

اورنگ آباد کے آئیکان ہسپتال میں الطاف شیخ نامی ڈاکٹر طبی خدمات انجام دیتے ہیں اور ان کے پاس شانتا بائی نامی بزرگ خاتون علاج کے لیے آئیں۔ ڈاکٹر الطاف نے خاتون کا علاج کیا۔

جب مریضہ ہسپتال سے رخصت ہونے لگیں تو وہ ڈاکٹر الطاف کو یہ کہتے ہوئے لگے لگا کر رونے لگیں کہ اس میں اسے اپنے بیٹے کی جھلک نظر آتی ہے جو فوج میں تھا اور شہید ہوگیا۔

شانتا بائی کو روتا ہوا دیکھ کر ڈاکٹر الطاف نے بھی انہیں گلے لگایا اور ان کی آنکھوں سے بھی آنسو جاری ہوگئے۔ ڈاکٹر اور مریضہ کے مابین والہانہ محبت کا ویڈیو سوشل میڈیا پر تیزی سے وائرل ہو رہا ہے اور ڈاکٹر الطاف کے اس جذبے کو خوب پزیرائی مل رہی ہے۔

اس دوران مہاراشٹر کے سابق وزیر اعلیٰ اشوک چوان نے اس ویڈیو کو سوشل میڈیا پر شیئر کرتے ہوئے لکھا 'ڈاکٹر الطاف کی ویڈیو میں عاجزی اور انکساری دیکھی اور بذات خود انہیں فون کرکے مریضوں کے تئیں اس طرح کے رویہ کے لیے ان کا شکریہ ادا کیا'۔

اس کے علاوہ متعدد سماجی و فلاحی تنظیموں نے بھی ڈاکٹر الطاف کے اس کام کی ستائش کرتے ہوئے انہیں تہنیت پیش کیا۔

واضح رہے کہ مریضہ شانتا بائی کا بیٹا بھارتی فوج میں تھا اور سات برس قبل شہید ہوگیا جبکہ ان کا دوسرا بیٹا ہارٹ اٹیک کی وجہ سے ہلاک ہوا۔ ایسے میں ایک مسلم ڈاکٹر کے ہمدردانہ اور جذبہ انسانیت سے پُر رویہ کی وجہ سے خاتون کے چہرے پر مسکراہٹ آئی۔